काठमाडौं । नेकपा (एमाले)ले सरकारले अस्थायी, ज्यालादारी र करारमा कार्यरत कर्मचारीलाई राजनीतिक पूर्वाग्रहका आधारमा बर्खास्त गरिरहेको आरोप लगाएको छ ।

संघीय मामिला तथा सामान्य प्रशासन विभागका प्रमुख किरण गुरुङले आज विज्ञप्ति जारी गर्दै सरकार कर्मचारीलाई हतोत्साहित गर्ने बाटोमा लागेको आरोप लगाएका छन् । “वर्तमान गठबन्धन सरकार स्थायी कर्मचारीको यो संयन्त्रलाई हतोत्साही बनाउने र दलगत स्वार्थमा प्रयोग गर्ने बाटोमा लागेको छ । नयाँ आर्थिक वर्षको थालनीसँगै संघ, प्रदेश र स्थानीय सरकारहरूले अस्थायी, ज्यालादारी र करारमा कार्यरत हजारौं कर्मचारीलाई राजनीतिक पूर्वाग्रहका आधारमा बर्खास्त गर्न थालेको कुराप्रति हाम्रो पार्टीको गम्भीर ध्यानाकर्षण भएको छ,” विज्ञप्तिमा भनिएको छ ।

एमालेले निश्चित विधि र प्रक्रियाबाट नियुक्ति तथा अवकाश पाउने कर्मचारीलाई विधि र प्रक्रियाविपरीत हटाएको आरोप लगाएको छ । प्रशासनको क्षेत्रमा अराजकता सिर्जना गर्नेगरी सरकारले काम गरेको भन्दै विरोध पनि गरेको छ ।
 
बहालमा रहेका सबै कर्मचारीलाई नियमित रुपमा काम गर्न पाउने गरी पेशागत सुरक्षा सुनिश्चित गर्न एमालेले सरकारसँग माग पनि गरको छ ।