काठमाडौं । नेपाल कम्युनिस्ट पार्टी (माओवादी केन्द्र)का अध्यक्ष पुष्पकमल दाहाल ‘प्रचण्ड’ले वर्तमान सत्ता गठबन्धन आउँदो निर्वाचनसम्म जाने बताएका छन् । बिहीबार पार्टी केन्द्रीय कार्यालय पेरिसडाँडामा बसेको स्थायी कमिटीको बैठकमा उनले गठबन्धनको विकल्प खोज्ने पक्षमा उभिन नहुने बताएका हुन् ।

उनले बरु गठबन्धनभित्रै समाजवादी केन्द्र वा उपगठबन्धन बन्न सक्ने बताएका थिए । विगतमा गरिएका गल्ती तथा कमजोरी स्वीकार नगरेको तथा कुनै पनि आत्मआलोचना नगरेका कारण नेकपा (एमाले)सँग गठबन्धन हुने ‘च्याप्टर क्लोज’ भएको अध्यक्ष प्रचण्डको भनाइ छ ।

उनले भने, “हामी अहिले गठबन्धनको विकल्प खोज्ने पक्षमा छैनौँ । यसैलाई बढी सुदृढ बनाएर निर्वाचनमा जानुपर्छ ।”

बैठकमा मुलुकको पछिल्लो राजनीतिक अवस्था, पार्टीको सांगठनिक जीवन एवं अवस्थालगायत विषयमा छलफल भएको थियो ।

बैठकमा अध्यक्ष प्रचण्डले संविधानको रक्षा, शान्ति, संविधानको सम्वद्र्धनका लागि स्थापना भएको गठबन्धनलाई बलियो बनाउने विषय नै यतिखेरको प्रमुख आवश्यक विषय भएको बताएका थिए ।

नेता गिरिराजमणि पोखरेलका अनुसार बैठक शुक्रबार बिहान पुनः बस्ने गरी स्थगन भएको छ । रासस