ब्रसेल्स । ग्रीष्मकालीन विश्राम ब्रसेल्समा आउनुअघि युरोपेली युनियन (ईयू)ले मंगलबार चीनसँग उच्च–स्तरीय व्यापार वार्ता गर्ने छ । चीनसँग वार्ता गर्न २७–सदस्यीय ब्लकले तीन महिनाभन्दा बढी समयदेखि प्रयास गरिरहेको थियो ।

व्यापारका लागि युरोपेली आयुक्त वाल्डिस डोम्ब्रोभस्किस र चिनियाँ उप–प्रधानमन्त्री लिउ हेले भर्चुअल बैठकको सह–अध्यक्षता गर्नेछन् । जसमा दुवै पक्षका व्यापार र अर्थशास्त्र मन्त्रालयका प्रतिनिधिहरू पनि सहभागी हुनेछन् । 

युरोपेली आयोगका प्रतिनिधिका अनुसार बैठकमा खाद्य सुरक्षा र ऊर्जा मूल्य, आपूर्ति व्यवस्था, वित्तीय सेवाहरू, द्विपक्षीय व्यापार र लगानी सरोकारसहित धेरै विश्वव्यापी आर्थिक चुनौतीहरूबारे छलफल गरिने अन्तर्राष्ट्रिय समाचार संस्था साउथ चाइना मर्निङ पोस्टले जनाएको छ । 

“युरोपमा युद्धको पृष्ठभूमि र विश्वव्यापी आर्थिक दृष्टिकोणमा बढ्दो अनिश्चितताकाबीच वार्ता भइरहेको छ,” एक प्रतिनिधिले भने ।

ईयू र चीनबीच अन्तिम उच्च–स्तरीय बैठक गत अप्रिलमा भर्चुअल शिखर सम्मेलनमा भएको थियो । युक्रेन—रुस युद्धमा चीनले आर्थिक वा सैन्य रूपमा समर्थन नगर्ने कुनै पनि आश्वासन ईयूले प्राप्त गर्न असफल भएपछि सो वार्ता विफल भएको थियो । तर दुवै पक्षहरू गर्मी आउनुअघि यी मुद्दाहरूमा ठोस उपायहरू खोज्न फेरि वार्ता गर्न सहमत भएका हुन् । जबकि ब्रसेल्सले बेइजिङलाई वार्ताको मिति तोक्न दबाब जारी राखेको थियो भने चीनले प्रतिक्रिया दिन समय लिएको थियो ।

अमेरिकाअन्तर्गत जर्मन मार्शल कोषका युरोप–चीन सम्बन्धमा बर्लिनस्थित विश्लेषक नोआ बार्किनले चीनले ढिलो प्रतिक्रिया दिनुलाई बेइजिङले युरोपसँगको नयाँ सम्बन्धमा समायोजन गर्न खोजेको हुन सक्ने बताएका छन् । 

साउथ चाइना मर्निङ पोस्टबाट ।