काठमाडौं । चालु आर्थिक वर्ष तथा साताको पहिलो कारोबारको दिन आज नेप्से परिसूचक झिनो अंकले बढेको छ ।

आज नेप्से परिसूचक १.९३ अंकले बढेर २०११.३९ बिन्दुमा पुगेको छ । त्यस्तै, सेन्सेटिभ इन्डेक्स ०.०२ अंक बढेको छ भने फ्लोट इन्डेक्स ०.०७ अंक र सेन्सेटिभ फ्लोट इन्डेक्स भने ०.०९ अंकले घटेको छ ।

आज कारोबारमा आएका २१० कम्पनीको ३० लाख ४५ हजार कित्ता सेयर एक अर्ब २३ करोड २४ लाख रुपैयाँ बराबरको खरिदबिक्री भएको छ । नेप्से झिनो अंकले बढे पनि कारोबार रकम भने घटेको छ ।

नेप्सेका १३ उपसमूहमध्ये ५ उपसमूहको परिसूचक बढेको छ भने बाँकी ८ उपसमूहको परिसूचक घटेको छ । जसमा बैंक उपसमूहको परिसूचक ०.६३ प्रतिशत, लगानीको ०.९१ प्रतिशत, जीवन बीमाको ०.१६ प्रतिशत, उत्पादन तथा प्रशोधनको ०.८६ प्रतिशत र व्यापार उपसमूहको ०.४२ प्रतिशत बढेको छ । तर यता,होटल तथा पर्यटन र जलविद्युत उपसमूहको परिसूचक १ प्रतिशतभन्दा बढीले घटेको छ ।

नेप्से सामान्य अंकले बढेसँगै राधी विद्युत कम्पनीको सेयरमूल्य ५.४८ प्रतिशतले बढेको छ भने प्रभु बैंक, नयाँ सारथी लघुवित्तको सेयरमूल्य ४ प्रतिशतभन्दा बढी बढेको छ । यता, सामुदायिक लघुवित्तको सेयरमूल्य साढे ७ प्रतिशत घटेको छ ।

अपर तामाकोशी हाइड्रोपावरको ६ करोड ४ लाख ६६ हजार रुपैयाँ बराबरको सेयर खरिदबिक्री भएको छ ।