जनकपुरधाम । नेपाली कांग्रेसका मधेस प्रदेशसभा सदस्य शिवचन्द्र चौधरीले महालेखापरीक्षकको कार्यालय संघीय सरकारको इसारामा चलेको आरोप लगाएका छन् । शनिबार बसेको प्रदेशसभा बैठकमा उनले यस्तो आरोप लगाएका हुन् ।

“संविधानले दिएको नियम सबैलाई एउटै हुनुपर्छ । तर, महालेखाले एउटै देशमा दुईवटा नियम बनाएको छ,” उनले भने, “भुक्तानीको लागि केन्द्र सरकारलाई ३१ गतेसम्म, प्रदेश र स्थानीय तहलाई २५ गतेसम्म मात्रै समय दिइएको थियो । यो कहाँको कानुन हो ?”

केन्द्र सरकारलाई संघीयता नपचेको भन्दै उनले राणाकालीन भेदभाव अझै कायम रहेको उल्लेख गरे ।

“प्रमाण हुँदाहुँदै पनि महालेखाले बेरुजु लेखिदिन्छ । छलफल नै नगरीकन प्रदेशसभामा पनि बेरुजु लेखिदिएको हामी सबैलाई जानकारी नै छ,” उनले भने, “त्यस्तो निकायले हामीलाई उर्दी जारी गर्छ । पहिला राणाकालमा उर्दी हुन्थ्यो । त्यही राणाकालको जस्तो अहिले महालेखाले हामीलाई उर्दी जारी गरेको छ ।”