काठमाडौं । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङदेनले पछिल्लो समय मुलुकको परराष्ट्र सम्बन्ध कमजोर भएको भन्दै चिन्ता व्यक्त गरेका छन् ।

शनिबार राजधानीमा आयोजित एक कार्यक्रममा उनले पछिल्लाा दिनमा सहायताका नाममा, विकासका नाममा सांस्कृतिक क्षेत्रमा भइरहेको अतिक्रमणले मुलुकको परराष्ट्र नीति चिन्ताजनक अवस्थामा पुगेको बताए । उनले सबै दलहरूसँग परामर्श गरेर तत्काल साझा धारणासहितको परराष्ट्र नीति बनाउन सरकारसँग आग्रह समेत गरे ।

पृथ्वीनारायण शाहका दिव्योपदेशलाई अनुशरण गरेर अघि बढ्न सके त्यसले मुलुकको राष्ट्रिय नीति र परराष्ट्र नीतिमा कुनै समस्या नआउने उनको भनाइ थियो ।

सत्तास्वार्थकै लागि दलहरूले जे पनि गर्ने गरेकाले मुलुकमा विदेशी हस्तक्षेप बढेको तर्क समेत उनले गरे ।

अध्यक्ष लिङदेनले सबै दलको सहमतिमा साझा परराष्ट्र नीति बनाउन सके बाह्य मुलुकको हस्तक्षेप झेल्नु नपर्ने पटक–पटक दोहोर्‍याए ।