काठमाडौं । भक्तपुरस्थित सहिद धर्मभक्त राष्ट्रिय प्रत्यारोपण केन्द्रमा एकैदिन चारजनामा मिर्गौला प्रत्यारोपण गरिएको छ । बिहीबार चारजनामा आफ्नै परिवारभित्रका दाताहरूबाट प्रत्यारोपण गरिएको अस्पतालका निर्देशक डा. पुकारचन्द्र श्रेष्ठले जानकारी दिए । 

प्रत्यारोपण गरिएकामा अर्घाखाँचीकी २६ वर्षीया महिला, दोलखाका २७ वर्षीय पुरुष, तनहुँका ३६ वर्षीय पुरुष र काभे्रका ३५ वर्षीय पुरुष छन् । उनीहरूलाई क्रमशः आमा, आमा, श्रीमती र बुबाले मिर्गौला दिएका हुन् । प्रत्यारोपण केन्द्रबाट हालसम्म नौ सय जनाको मिर्गौला प्रत्यारोपण गरिएको डा. श्रेष्ठले बताए । केन्द्रमा मिर्गौला प्रत्यारोपणका लागि ६ सयजना ६५३ जना पर्खाइमा रहेको तथ्यांक छ । 

सातै प्रदेशबाट मिर्गौला प्रत्यारोपण सेवा विस्तारको तयारी भइरहेको केन्द्रले जनाएको छ  । यसअघि, असार ९ गतेदेखि पोखरा स्वास्थ्य विज्ञान प्रतिष्ठानबाट मिर्गौला प्रत्यारोपण सेवा सुरु भइसकेको छ । सुर्खेतको प्रादेशिक अस्पतालका विशेषज्ञ तथा स्वास्थ्यकर्मीहरूलाई तालिम दिने काम भइरहेको केन्द्रका नेफ्रोलोजी विभाग प्रमुख डा. कल्पना श्रेष्ठले बताइन् ।

मिर्गौला प्रत्यारोपण गर्नुपर्ने बिरामीको तुलनामा दाताको संख्या निकै कम भएपछि मस्तिष्क मरण भएका व्यक्तिहरूबाट अंगदान गर्ने अभ्यास बढाउनुपर्ने डा. श्रेष्ठको भनाइ छ । मस्तिष्क मृत्यु भएका व्यक्तिहरूबाट आठवटा अंग जीवित व्यक्तिलाई दिन सकिनेमा नेपालमा हाल मिर्गौला, कलेजो र आँखा प्रत्यारोपण गर्ने अभ्यास भइरहेको छ । 

केन्द्रमा अंग दानका लागि २ हजार ३३ जनाले लिखित प्रतिबद्धता जनाएका छन् भने हालसम्म ८ जनाको मात्रै मस्तिष्क मृत्युबाट अंग प्रत्यारोण गरिएको केन्द्रको तथ्यांक छ ।