काठमाडौं । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले आफ्नो भारत भ्रमण आकस्मिक नभएको बताएका छन् । भारत भ्रमणमा जानुअघि त्रिभुवन विमानस्थलमा पत्रकारहरूसँग कुरा गर्दै उनले तत्कालीन भारतीय राजदूत विनमोहन क्वात्राले भ्रमणको निम्तो दिइएको र निर्धातिर भ्रमण भएको बताए । 

“बाहिर आउँदा आकस्मिक जस्तो देखियो, तर मेरा लागि आकस्मिक होइन । दुई महिनाअघि राजदूत क्वात्राकै समयमा मिलाइएको हो’, प्रचण्डले भने, “उहाँ राजदूत भएर विदेश सचिव भएपछि पनि उहाँले मलाई भ्रमणको समय कुन बेला उपयुक्त हुन्छ भनेर सोध्नुभएको थियो । त्यसबेला मैले जुलाईको तेस्रो हप्ता हुनसक्छ भनेको थिएँ ।” 

उनले भ्रमणमा नेपाल भारत सम्बन्ध अझ राम्रो कसरी बनाउने भन्नेमा भारतीय जनता पार्टीका नेताहरूसँग कुरा हुने बताए । नेपाल भारतका हितका विविध पक्षमा छलफल हुने उनले बताए । आफू उत्साहित भएर भ्रमणमा जान लागेको पनि उनले बताए ।

प्रचण्डले चिनियाँ कम्युनिस्ट पार्टीका नेता फर्किएलगत्तै आफ्नो भ्रमण हुनु संयोग मात्र भएको पनि बताए ।