काठमाडौं । विराटनगरकी पंचमदेवी आज बिहानैदेखि सर्वोच्च अदालतमा आफ्नो इजलासबाहिर मुद्दाको पालो कुरिरहेकी थिइन् । उनलाई आफ्नो मुद्दा परेको इजलासमा आज ४५ बढी मुद्दा परेको जानकारी थियो । तर, आफ्नो मुद्दा १३ नम्बरमा रहेकाले आज चाहिँ पक्कै पालो आउने उनलाई लागेको थियो ।

तर, उनले सोचेजस्तो भएन । मुद्दाहरू हेरिँदै जाँदा इजलासबाट सूचना आयो– ११ नम्बर पछिका सबै मुद्दा 'हेर्न नभ्याइने' सूचीमा राखिएको छ । अर्थात् उनको मुद्दाको पालो आज पनि आएन ।

त्यसपछि पंचमदेवी इजालसमै गएर भक्कानो छाडेर रुन थालिन् । इजलासमा रहेका न्यायाधीश बमकुमार श्रेष्ठले उनलाई सम्झाउने प्रयास गरे । सँगै आउँदो पेसीमा उनलाई अग्राधिकार दिने वाचा गरे ।

अनि मात्र पंचमदेवी आँसु पुछ्दै इजलासबाट बाहिरिन् ।

के हो मुद्दा ?
पंचमदेवी २०६२ सालदेखि विराटनगरस्थित साल्ट ट्रेडिङमा प्याकेजिङको काम गर्थिन् । ०६७ सालमा उनीसहित साल्ट ट्रेडिङका कामदारहरूले ट्रेड युनियनमार्फत् आफूहरूलाई स्थायी गराउन माग गरेर साल्ट ट्रेडिङविरुद्ध आदोलन गरे । त्यसपछि उनी र साल्ट ट्रेडिङबीच विवाद सुरु भएको थियो ।

विवादपछि पंचमदेवी श्रम तथा रोजगार कार्यालय पुगिन् । त्यहाँबाट उनले स्थायी नियुक्ति त पाइन् तर साल्ट ट्रेडिङले कार्यान्वयन गरेन । बरु पुनरावेदनको हदम्याद नै गुजारेर साल्ट ट्रेडिङ आफैँ श्रम कार्यालयको निर्णयविरुद्ध श्रम अदालत पुग्यो । तर, श्रम अदालतले पुनरावेदन गर्न अस्वीकार गर्‍यो ।

त्यसपछि पंचमदेवीसहित १५ जनालाई विपक्षी बनाएर साल्ट ट्रेडिङ आफैँ सर्वोच्चमा पुग्यो । २०७२ भदौ ६ मा सर्वोच्चमा दर्ता भएको रिटमा अहिलेसम्म २० भन्दा बढी पटक पेसी तोकिएको छ । तर, अहिलेसम्म सुनुवाइ भएको छैन ।

पंचमदेवीलाई पालो अगाडि परेपछि आज मुद्दाको प्रक्रिया अगाडि बढ्ले आश थियो । तर, हेर्न नभ्याइने भनेर सूचना पाएपछि उनि इजलासमै गएर भक्कानिएकी हुन् ।

सर्वोच्चमा मुद्दाका चाङ
सर्वोच्च अदालतको २०७८/०७९ को वार्षिक प्रतिवेदन अनुसार सर्वोच्चमा पाँच वर्ष नाघेका २२०० बढी मुद्दाको अन्तिम टुंगो लागेको छैन ।

सर्वोच्चले पाँच वर्षभन्दा पुराना मुद्दाको फर्छ्यौट गर्नका लागि साउन १ गते बाट लागु हुने गरी 'विचाराधीन पुराना बक्यौता मुद्दा न्यूनीकरण कार्ययोजना, २०७९" ल्याएको छ । जसले  आर्थिक वर्ष २०८०/०८१ को अन्त्यसम्म पाँच वर्ष पुराना मुद्दाहरू शून्यमा झार्ने लक्ष्य लिएको छ ।