काठमाडौं । काठमाडौंको बौद्धस्थित फूलबारीमा रहेको शाम्बाला थुक्पा उद्योगमा कामदारहरू सुखा गहुँको थुक्पा बनाउन व्यस्त हुन्छन् । उक्त उद्योग बौद्धमा ताजा बनेको थुक्पा बेच्ने एक दर्जन उद्योगमध्ये एक हो । बौद्धमा दशकौंदेखि यस्ता उद्योग छन् । यी उद्योगमा अक्सर सोही क्षेत्रका शेर्पा, तामाङ, योल्मो र तिब्बतियनहरू काम गर्छन् । थुक्पालाई स्थानीय चाउचाउ पनि भन्छन् । 

शाम्बाला थुक्पा उद्योग भए पनि यसलाई चाउचाउ कारखानाको नाम दिएका छन्, यसका मालिक समिर तामाङले । शाम्बालामा थुक्पा बनाउन पहिले पिठो, अण्डा र पानीको मिश्रण बनाइन्छ । त्यसपछि साइज अनुसारको मेसिनमा कटर जोडिन्छ र बनेको थुुक्पाको लामो तार निस्किन्छ। पिठोलाई थुक्पामा परिणत गर्न करिब डेढ घण्टा लाग्ने गर्दछ । ताजा थुक्पाको ‘लाइफ’ पाँचदेखि छ महिना हुन्छ । शाम्बालामा तामाङले तीनवटा फरक साइजका थुक्पा बनाउँछन् । 

तामाङ भन्छन्, “चाउचाउ (थुक्पा) बाह्रै महिना चल्ने भएकाले व्यापार पनि ठिकै हुने गर्छ । यसका ग्राहक बौद्ध क्षत्रका मात्र नभई सहरका अन्य भागका रेस्टुरेन्टहरू पनि हुन् ।” पहिले हिमालय क्षेत्रका मानिसले मात्रै खाने थुक्पा आजकाल सबै क्षेत्रमा ठूलो खपत हुन्छ ।