टोकियो । जापानका पूर्वप्रधानमन्त्री सिन्जो आबेलाई अन्तिम श्रद्धाञ्जलि दिन हजारौँ मानिसहरू टोकियोको सडकमा लाइन लागेका छन् । आबेको शव बोकेको शववाहन गाडीले सहर परिक्रमा गर्दै उनको याद बोकेका धेरै स्थल पार गर्नेछ । 

साथीभाइ र नजिकका आफन्तका लागि मात्र खुला रहेको निजी अन्त्येष्टि यसअघि जोजोजी मन्दिरमा भएको थियो । ६७ वर्षीय वृद्ध आबेको गत शुक्रबार दक्षिणी जापानको नारामा चुनावी भाषण दिने क्रममा गोली हानी हत्या गरिएको थियो ।

उनको सम्मानमा टोकियोभरि र मन्दिरबाहिर राष्ट्रिय झन्डा आधा झुकाइएको छ । श्रद्धाञ्जलि दिनेहरू लामो लाइनमा बसेका छन् । धेरैले फूलका गुच्छा बोकेका छन् भने लाइन दुईवटा ब्लकसम्म फैलिएको बीबीसीले जनाएको छ । भावविह्वल भएका धेरैले आबेले उनीहरूलाई सुरक्षा दिएको बताएका छन् । एक महिलाले भनिन्, “कोभिडको समयमा आबे प्रधानमन्त्री हुँदा उनले प्रभावकारी रूपमा देश सम्हालेका थिए ।”

आबेले दोस्रो विश्वयुद्धपछि सबैभन्दा लामो समय प्रधानमन्त्री बनेर देशको सेवा गरेका थिए । उनी जापानको सबैभन्दा प्रभावशाली राजनीतिज्ञका रूपमा चिनिन्थे । 
स्रोत : बीबीसी