काठमाडौं । संस्कृति, पर्यटन तथा नागरिक उड्डयनमन्त्री प्रेमबहादुर आलेले पदबाट राजीनामा दिएका छन् । उनले पार्टी अध्यक्ष माधवकुमार नेपाललाई राजीनामापत्र बुझाएको नेकपा (एकीकृत समाजवादी)का एक नेताले जानकारी दिए ।
आलेले पत्रकार सम्मेलन गरेर प्रगति विवरण सार्वजनिक गर्ने तयारी समेत गरेका छन् ।
अध्यक्ष नेपालले आज बिहान अखिल नेपाल महिला संघको कार्यक्रममा केही मन्त्रीहरूको राजीनामा आफ्नो गोजीमा भएको सुनाएका थिए ।
उनले केही मन्त्रीको राजीनामा आफूले बोकेर हिँडेको बताएका थिए । पार्टी कार्यालय पुगेर आलेले राजीनामा बुझाएको स्रोतले जानकारी दियो ।
उनले शुक्रबार बसेको पोलिट्ब्युरो बैठकमा ४८ घण्टाभित्र राजीनामा बुझाउने बताएका थिए । सरकारमा रहँदा निकै विवादित बनेका आलेले त्यसअघि कुनै पनि हालतमा राजीनामा नबुझाउने बताएका थिए ।
आइतबार कार्यालय पुगेर अध्यक्ष नेपाललाई राजीनामापत्र बुझाएका हुन् । अन्य मन्त्रीले भने राजीनामा बुझाएका छैनन् ।