राजस्व अनुसन्धान विभागले नियन्त्रणमा लिएर सशस्त्र प्रहरीको पहरामा सडकबाट काठमाडौं ल्याइँदै गरेको दुई ट्रक रासायनिक मल शनिबार धादिङको धार्केमा अराजक भिडले खोस्यो । शान्तिपूर्ण प्रदर्शनमा गोली ठोक्ने सशस्त्र प्रहरी भने तमासा हेरेर बस्यो ।
 
शनिवारै नेपाल भ्रमणमा काठमाडौं आएका संयुक्त अरब इमिरेट्स (युएआई) का राजकुमारले झापा पुर्‍यfएर नेकपा (एमाले)का नेता तथा एकजना व्यवसायीलाई ‘सुनको लौरो’ उपहार दिए । तस्करहरूले मलद्वारमा कोचेर ल्याएको सुनसमेत समात्न सक्ने विमानस्थल भन्सारले सुनको लौरो नै तस्करी भएको भने पत्तै पाएनछ ।
 
धान रोप्ने बेलासम्म पनि सरकारले मलको व्यवस्था गर्न सकेन । बर्सेनी खेतीको सिजनमा रासायनिक मलको अभाव हुने गरेको छ । यो समस्या दशकौं हुँदा पनि समाधान भने भएन । मधेसका किसानले जुगाड गर्दा भने सरकारले खोस्ने गरेको छ ।  
 
धार्केमा मल लुट्नेहरू किसानै होलान् । मल ‘ब्ल्याक’मा बेचिनुको सट्टा किसानको बारीमा पुग्ला । तैपनि सडकमा मल सशस्त्र प्रहरीकै पहरामा त यसरी लुटपाट हुन्छ भने मलभन्दा महँगो सामान सुरक्षितरूपमा ढुवानी होला भनेर पत्याउन सकिएला रु
 
एक जमानामा एक जना कुख्यात विदेशी अपराधीले त्रिभुवन अन्तर्राष्ट्रिय विमानस्थलबाट ‘हात्ती’ छिराउने गुड्डी हाँकेका थिए । नेपाल भ्रमणमा आएका कथित विशिष्ट पाहुनाले भने हात्ती त होइन सुनको लौरो भने सहजै छिराएछन् ।
 
सरकारी संयन्त्रको नालायकी लुकाउन मल लुटिएको वा सुन तस्करी भएको विषयमा अनेकौं भाष्य तयार हुनसक्छ । राजस्व अनुसन्धान विभागले मलको बोकेको ट्रक नियन्त्रणमै लिएको र सशस्त्र प्रहरीले पहरा दिएको अभिलेख मेटाउने हो भने वा सुनको लौरो नक्कली हो भनिदिने हो भने कुरै  सामसुम हुन्छ ।  
 
नेपाली जनता बिर्सन खप्पिस छन् । बजेट काण्डलाई एसपीपीले बिर्साइदियो । मल लुटिएको वा सुनको लौरो तस्करी गरिएको घटना पनि अर्को काण्डले बिर्साइदिन सक्छ । केही नभए मन्त्रिपरिषद् हेरफेर गरेर विवादमा परेका मन्त्री हटाइदिए पहिलेका सबै बदमासी जनताले बिर्सिदिन्छन् । 
 
यस प्रकारको अराजकताले राज्य भने असफल हुन्छ । नेपालको संविधान, २०७२ जारी भएपछिका सबै सरकारहरूले जानेर नजानेर नेपाललाई ‘असफल राज्य’ बनाउन ‘योगदान’ जो गरेका छन् । 
 
राज्य असफल हुन नदिने हो भने विशेषगरी सरकारी संयन्त्रका यस्ता कमजोरी र बदमासीमा संलग्न कर्मचारी वा राजनीतिक नेतृत्वले अपराधअनुसारको सजाय पाउनुपर्छ । सुरक्षाकर्मी र भन्सार तथा राजस्व अनुसन्धानका कर्मचारीको मिलेमतो नभई न मल लुटिन सक्छ न सुनको लौरोको तस्करी हुनसक्छ ।
 
राजमार्गमा ट्रक लुटिँदा जोगाउन नसक्ने सशस्त्र प्रहरी र सुनको लौरो तस्करी हुँदा भन्सारमा तैनाथ कर्मचारी र सुरक्षाकर्मीलाई जिम्मेवार बनाउनुपर्छ ।  यिनलाई विशिष्ट कक्ष प्रयोग गर्न दिन अनुरोध गर्ने युएईको स्थानीय दूतावाससँग स्पष्टीकरण लिएर कारबाही सुरु गर्नुपर्छ ।
 
रह्यो युएईका राजकुमार भनिएका विवादास्पद व्यक्ति । तिनका बारेमा तत्काल छानबिन गरेर स्वदेश नफर्कँदै निर्क्योल गर्नुपर्छ । राजकुमार सक्कली नै ठहरिए कूटनीतिक माध्यमबाट  कडा विरोध जनाउनुपर्छ ।
 
आयन्दा कसैले पनि नेपालको कानुनको यसरी उपहास गर्ने आँट नगरून् भन्ने हो भने सरकार नरम हुनुहुँदैन । नत्र नेपाली जनताले मात्र होइन अन्तर्राष्ट्रिय समुदायलेसमेत नेपाल सरकारलाई कुरीकुरी गर्नेछन् ।