मस्को । रुसले पूर्वी युक्रेनी सहर सेभेरोडोनेत्स्कमा रहेको एजट केमिकल प्लान्टमा आश्रय लिएका युक्रेनी फौजलाई आत्मसमर्पण गर्ने मौका दिएको बताएको छ । 

दुवै सहर र एजट प्लान्ट हालैका हप्ताहरूमा द्वन्द्वको केन्द्र बनेका छन् । सहर कब्जा गर्न खोजिरहेका रुसी सेनाले तीव्र गोलाबारी गर्दैगर्दा युक्रेनी सर्वसाधारण र सैनिकहरू कारखानामा लुकेको स्थानीय अधिकारीहरूले बताएका छन् । 

रुसले सर्वसाधारणलाई बाहिर जान अनुमति दिन बुधबार मानवीय करिडोर खोल्ने बताएको छ । यसैबीच, रुसले युक्रेनी फौजलाई ‘उनीहरूको मूर्ख प्रतिरोध बन्द गर्न र हतियार बिसाउन’ आग्रह गरेको छ । 

“मानवताका सिद्धान्तहरूद्वारा निर्देशित रुसी सशस्त्र बल र लुहान्स्क जन गणतन्त्रका संरचनाहरू सर्वसाधारणलाई बाहिर निकाल्न मानवीय अभियान सञ्चालन गर्न तयार छन्,” रुसी रक्षा मन्त्रालयले मंगलबार भनेको छ । 

बुधबार बिहान ८ बजे (०५ः०० जीएमटी) देखि मस्कोको समय अनुसार राति ८ बजेको बिचमा मानवीय करिडोर खुला गरिने रक्षा मन्त्रालयले बताएको छ । विस्थापितहरूलाई लुहान्स्कको पृथकतावादी नियन्त्रित क्षेत्रको स्वार्वो सहरमा लगिने बताइएको छ । 

सेभेरोडोनेत्स्कलाई युक्रेनी नियन्त्रित क्षेत्रसँग जोड्ने सिभर्स्की डोनेट्स नदीका सबै पुलहरू ध्वस्त भएका छन् । 

आत्मसमर्पणको आह्वान गर्दै रुसी रक्षा मन्त्रालयले युक्रेनी फौजले सर्वसाधारणलाई मानव ढालको रूपमा प्रयोग गरेको आरोप लगाएको छ । मस्कोले फेब्रुअरीमा युक्रेनमा आफ्नो सेना पठाएदेखि धेरे पटक किभले अस्वीकार गरेको यस्तै आरोपहरू लगाएको छ । 

युक्रेनी अधिकारीहरूले एजट प्लान्टभित्र पाँच सय भन्दा बढी सर्वसाधारण लुकेको र उनीहरूलाई सहयोग गर्न कठिन भएको तर प्लान्टभित्र केही भण्डारहरू रहेको बताएका छन् ।

लुहान्स्कका पृथकतावादी अधिकारीका एक जना प्रतिनिधिले भने त्यहाँ करिब २५ सय युक्रेनी तथा विदेशी लडाकुहरू थुनिएको हुन सक्ने अनुमान गरेका छन् । 

रुसी रक्षा मन्त्रालयले किभलाई आफ्नो प्रस्तावबारे जानकारी गराएको र आत्मसमर्पण गर्ने आदेश दिन अधिकारीहरूलाई आग्रह गरेको बताएको छ । 

यसैबीच, युक्रेनी राष्ट्रपति भोलोदिमिर जेलेन्स्कीले केही युरोपेली नेताहरूको ‘संयमपूर्ण व्यवहार’को आलोचना गर्दै पश्चिमबाट भारी हतियारको लागि पुनः अपील गरेका छन् । 

अलजजीराबाट ।