धादिङ । धादिङको त्रिपुरासुुन्दरी गाउँपालिका–५, घिमिरेगाउँमा पहिरोले घर पुरिँदा एकजना हराइरहेका छन् ।

घरमाथिबाट खसेको पहिरोले घर पुरिएपछि त्रिपुरासुन्दरी गाउँपालिका–५, घिमिरेगाउँका ५५ वर्षीय सीताराम भनिने नेत्रप्रसाद खाँण हराइरहेको जिल्ला प्रहरी कार्यालय धादिङका प्रहरी निरीक्षक सूचना अधिकारी राम थापाले जानकारी दिए ।

रातिको समयमा अविरल वर्षाका कारण घर माथिबाट सडक खनेर थुपारिएको माटोको ढिस्कोसहितको लेदोले पुरिएको थियो । घरका अरू सदस्य अर्काे घरमा रहेकाले सकुशल छन् । खाँणको अवस्था भने पत्ता लागेको छैन । पहिरोले घर छोपिएको छ ।

ठूलो पहिरोले घर पुरिएका कारण उद्धारमा समस्या आएको छ । स्थानीय, नेपाल प्रहरी उद्धारमा लागिरहेका छन् । घटनास्थल क्षेत्रमा जेसीबी जान नसकेको र थप उद्धार टोली आवश्यक भएको नेपाल रेडक्रस सोसाइटीका सभापति नारायण तिमल्सिनाले जानकारी दिए । रासस