मस्को । युक्रेनमा युद्ध गर्न दिइएको आदेश अस्वीकार गर्ने रुसको रोस्ग्भार्दियाका एक सयजना भन्दा बढी सदस्यलाई बर्खास्त गरिएको छ । रोस्ग्भार्दियालाई राष्ट्रपति भ्लादिमिर पुटिनको 'निजी सेना' भनिने गरिन्छ । 

उनीहरूले सामूहिक रूपमा मुद्दा दायर गरी आफूहरूलाई अवैध ढंगले बर्खास्त गरिएको भन्दै कानुनी चुनौती दिएका थिए । तर उनीहरूको मुद्दालाई रुसी सैनिक अदालतले खारेज गरिदिएको छ । दि गार्जियन नामक अखबारले ती सैनिकका कमान्डरहरूले युद्धमा जाने वा सजाय भोग्ने छनोट दिएको उनीहरूका वकिललाई उद्धृत गर्दै जनाएको छ । 

रुसका विभिन्न सञ्चार माध्यमले रुसको नेसनल गार्डका सदस्यहरूलाइ यसरी कारबाही गरिएको तथ्य पुष्टि गरेका छन् । दि गार्जियनकाअनुसार बर्खास्त गरिएका नेसनल गार्डका ११५ जना सदस्य अन्य सेना भन्दा पृथक छन् भने उनीहरूलाई क्रेमलिनले आंकवादविरुद्ध लड्ने र सरकार विरोधीहरूलाई तह लगाउने आन्तरिक सरक्षा फौजका रूपमा प्रयोग गर्दै आएको हो । 

बिज्नेस इन्साइडरबाट ।