चालकले जानीजानी विमान दुर्घटना बिरलै गराउँछन् । तैपनि, अधिकांश विमान दुर्घटना कुनै न कुनै प्रकारको मानवीय त्रुटि वा हेलचेक्य्राँइका कारण हुनेगर्छ । यसैले विमान कम्पनी र नियामक निकाय सजग भएमा अधिकांश दुर्घटना टार्न सकिन्छ ।
 
पोखराबाट जोमसोम जाँदै गरेको तारा एयरको विमान आइतवार दुर्घटनामा परेको छ । तारा एयरका अनुसार पोखराबाट ९ः५५ बजे उडेको ट्विनअटर मुस्ताङको थासाङ - २ को सानुसरे भीरमा दुर्घटनाग्रस्त अवस्थामा फेला परेको हो ।  

विमानमा २ जना जर्मन, ४ जना भारतीय र १३ नेपाली यात्रु तथा चालकदलका सदस्य ३ जनासमेत २२ जना थिए । प्रत्यक्षदर्शीले दिएको जानकारीअनुसार घटनास्थलको प्रकृति हेर्दा यात्रुहरू जीवित भेटिने सम्भावना अत्यन्त कम देखिन्छ ।

यसअघिका दुर्घटनामा जस्तै सरकारले यसपटक पनि आधिकारिक छानबिनका लागि औपचारिक समिति गठन गर्नेछ । समितिको प्रतिवेदन दराजको कुनै कुनामा थन्क्याइनेछ । सम्बन्धित अधिकारी कसैले पनि त्यस प्रतिवेदनलाई सम्झनेछैनन् ।  
 
पीडितका आफन्तका लागि भने दुर्घटना आजीवन हृदयविदारक हुन्छ । मर्नेहरूको मात्र होइन बाँच्नेहरूकै निम्ति पनि संसार स्वाहा हुनपुग्छ । विडम्बना, राज्य र विमान कम्पनीले भने उस्तै हेलचेक्य्राइँ दोहोर्‍याई रहनेछन् ।
   
हवाई दुर्घटनाका कारणहरूमा मूलतः चालकको असावधानी, एयर ट्राफिक कन्ट्रोलरको गल्ती, निर्माणको त्रुटि, मर्मत सम्भारको कमजोरी, विध्वंश तथा प्रतिकूल मौसम प्रमुख हुने मानिन्छ । नेपालमा यी सबै कारणहरू विद्यमान देखिन्छन् ।

नेपालमा सुरक्षाका नियमहरू पालनामा आलटाल गरिने र थोत्रा जहाजहरूबाट हवाई उडान गराइने कारणले पनि दुर्घटनाको जोखिम बढाएको मानिन्छ । सरकारी कम्पनीले नै थोत्रा र सुरक्षा जोखिम भएका जहाज उडाउने हुनाले पनि नियामक निकाय मौन रहेको हुनसक्छ ।
 
 सरकारी निकाय र विमान कम्पनीले हवाई सुरक्षामा हेलचेक्य्राइँ गर्न थालेपछि विमान दुर्घटना पनि बढ्ने गर्छ । आइतवार भएको तारा एयरको विमान दुर्घटनाको कारण त अहिलेसम्म थाहा भइसकेको छैन । तर, कतै न कतै हवाई सुरक्षामा हेलचेक्य्राइँ भएको हुनसक्ने सन्देह भने उत्पन्न हुन्छ । 
 
 यसैले सरकारले यसपटक छानबिनलाई औपचारिकतामा सीमित नगरोस् । कम्तीमा दुर्घटनाको कारण पत्ता लगाउन र त्यसमा कसैको दोष भेटिएमा कारबाही गर्न पनि मोलाहिजा नगरोस् । 
 
साथै, चालकदलका सदस्य विशेषगरी निजी विमान कम्पनीका कामदारमाथि पर्ने चर्को कार्यबोझको दबाबलगायतका विषयमा नियामक निकायले ध्यान देओस् । रोक्न नसकिए पनि नियामक निकायका अधिकारी र सेवा सञ्चालकहरू इमानदार हुने हो भने धेरै हवाई दुर्घटना टार्न सकिन्छ । हेलचेक्य्राइँको मार आफैँमाथि पनि पर्न सक्छ भन्ने नबिर्सौँ ।