वीरगन्ज । पर्साको कालिकामाई गाउँपालिकाको अध्यक्षमा जनता समाजवादी पार्टी (जसपा)का उमेदवार नेपाली कांग्रेसका उमेदवारभन्दा ८० मतान्तरले पछाडि परेका छन् ।

वडा नम्बर–१ देखि ४ सम्मका आठ हजार ७७६ मत गन्दा कांग्रेसका उमेदवार अजय पटेल जसपाका वशिष्ट गुप्ताभन्दा ८० मतान्तरले अगाडि छन् । पटेलले तीन हजार ८० मत ल्याएका छन् । गुप्ताले तीन हजार मतसहित पछ्याइरहेका छन् । ६ हजार ४८९ मत गन्दासम्म गुप्ता ३६१ मतान्तरले अगाडि थिए । नेकपा (एमाले)का उमेदवार राजेशकुमार चौरसिया एक हजार १२८ मतसहित तेस्रो स्थानमा छन् ।

भर्खरै वडा नम्बर–५ को मतपेटिका खोलिएको छ । पाँच वडा रहेको गाउँपालिकामा अबको नेतृत्व यही वडाको मतगणनाले निर्धारण गर्नेछ ।

उपाध्यक्षमा पनि कांग्रेसकी उमेदवार राजमतीदेवी चौरसियाले तीन हजार ४३९ मतका साथ अग्रता लिएकी छन् । जसपाकी उमेदवार सहानी खातुन तीन हजार ६५ मतका साथ दोस्रो स्थानमा छिन् । एमालेकी अंशु आनन्दले ७४६ मत प्राप्त गरेकी छन् ।