काठमाडौं । स्थानीय तह निर्वाचन सम्पन्न भएर देशभरका पालिकाहरूमा मत गणना जारी छ । थोरै स्थानीय तहमा मतगणना सम्पन्न भएको छ ।
सम्पन्न भएका स्थानीय तहको मत परिणामले एमालेलाई अग्रस्थानमा उभ्याएको छ । अहिलेसम्मको मत परिणामअनुसार नेकपा एमाले ८ स्थानीय तहमा प्रमुख पद जितेर अघि लागेको छ ।
नेपाली कांग्रेसले सात स्थानीय तहको नेतृत्वसहित दोस्रो स्थानमा छ । एमालेले सात स्थानीय तहमा उपप्रमुख÷उपाध्यक्ष जितेको छ भने उपप्रमुख÷उपाध्यक्षमा कांग्रेसले पनि आठ स्थानीय तह जितेको छ ।
तेस्रो स्थानमा नेकपा नेकपा माओवादी केन्द्रले तीन स्थानीय तहमा प्रमुख जितेको छ । दुई स्थानीय तहमा माओवादीले उपप्रमुख÷उपाध्यक्ष जितेको छ । चौथो स्थानमा नेकपा एकीकृत समाजवादी छ । नेकपा एसले दुई स्थानीय तहमा प्रमुख र उपप्रमुख दुवै जितेको छ ।
अन्य पार्टीले भने अहिलेसम्म पालिकाका खाता खोलेका छैनन् । मतगणना जारी भएका २६८ स्थानीय तहमा कांग्रेसले अग्रता लिएको छ भने नेकपा एमालेको १७९ स्थानीय तहमा अग्रता देखिएको छ ।
नेकपा माअोवादी केन्द्रको १०६ स्थानीय तहमा अग्रता देखिएको छ भने नेकपा एकीकृत समाजवादीको १२ स्थानीय हमा अग्रता देखिएको छ । जनता समाजवादीले २५ स्थानीय तहमा अग्रता कायम गरेको छ भने लोकतान्त्रिक समाजवादी पार्टी ६ स्थानीय तहमा अग्रता कायम गरिरहेको छ ।