काठमाडौं । राष्ट्रिय प्रजातन्त्र पार्टी (राप्रपा) अध्यक्ष राजेन्द्र लिङ्देनले गरेको नयाँ कार्यविभाजनले असन्तुष्टि सिर्जना गरेको छ । लिङ्देनले बिहीबार गरेको कार्यविभाजनले पार्टी महामन्त्री धवलशमशेर राणालाई पार्टीको संगठन विभाग प्रमुखबाट मुक्त गरिएको छ ।

वरिष्ठ नेता तथा उपाध्यक्ष बुद्धिमान तामाङलाई संगठन विभाग प्रमुखको जिम्मेवारी तोकिएको छ । यसअघि तामाङ राजनीतिक विभाग प्रमुख थिए । स्थानीय तह परिचालन विभागको प्रमुखको जिम्मेवारी वरिष्ठ नेता उपाध्यक्ष ध्रुवबहादुर प्रधानलाई दिइएको छ ।

राजनीतिक विभागको प्रमुखमा वरिष्ठ उपाध्यक्ष रवीन्द्र मिश्र, पर्यटन विभागको प्रमुखमा सहायक महामन्त्री विजय खड्का, विपद् व्यवस्थापन विभागको प्रमुखमा केन्द्रीय सदस्य उद्धव थापालाई जिम्मेवारी तोकिएको  छ ।

सूचना प्रविधि विभाग (आईटी)को प्रमुखमा केन्द्रीय सदस्य उद्धवराज भेटुवाल र लेखा समितिको प्रमुखमा केन्द्रीय सदस्य केदार न्यौपाने छन् । महामन्त्रीलाई नयाँ जिम्मेवारी नै नदिँदा राप्रपामा विवाद चुलिएको छ ।

पूर्वअध्यक्ष समेत रहेका नेता डा. प्रकाशचन्द्र  लोहनीले सामाजिक सञ्जालमार्फत नै असन्तुुष्टि पोखेका छन् । उनले बिरामी भएको बेलामा संवेदना समेत नदेखाएको भन्दै निर्णय अस्वीकार गरेका छन् ।

“राप्रपाका सांसद तथा महामन्त्री धवलशमशेर बिरामी भएर विदेशमा उपचार गर्दै हुनुहुन्छ यस्तो बेलामा उहाँलाई संगठन विभागको प्रमुखबाट हटाउनु अविवेक तथा अमानवीय निर्णय हो र बिरामी साथीलाई तनाव दिने काम मात्र हो, यो निर्णयप्रति म दुःख व्यक्त गर्दछु र मेरो असहमति स्पष्ट गर्दछु,” उनले लेखेका छन् ।

लोहनीले सार्वजनिक रूपमा नै टिप्पणी गरेपछि तरंग नै पैदा भएको छ । सांसद मुम्बईमा उपचार गरिरहेका छन् । नेताहरूका अनुसार उनलाई पहिलो चरणको गिजाको क्यान्सर देखिएको छ । यस्तो अवस्थामा जिम्मेवारीबाट हटाइएको भन्दै नेताहरूले सामाजिक सञ्जालमा आक्रोश पोखेका छन् । पार्टीमा छलफल नै नगरी अध्यक्षले एकलौटी निर्णय गरेको आरोप नेताहरूले लगाएका छन् ।

पार्टीका प्रवक्ता सगुन सुन्दर लावतीले सार्वजनिक बिदाको दिन गरिएको विधानविपरीत निर्णयले नेता कार्यकर्तालाई चिन्तित बनाएको बताए । “उहाँ उपचारमा हुनुहुन्छ । यस्तो संवेदनशील अवस्थामा कसैसँग परामर्श नगरी विज्ञप्ति सार्वजनिक भयो,” उनी भन्छन्, “पार्टी अध्यक्ष अभिभावक हो । सजाय पाएका अभियुक्तलाई त उपचार दिइन्छ । सार्वजनिक बिदाको दिन यस्तो निर्णय गर्नुपर्ने हतार किन थियो ?”

आफू अनुकूल विधानको व्याख्या
पार्टीका प्रवक्ताहरूले नै विधानको व्याख्या आफू अनुकूल गरेका छन् । राणा निकट लावती पार्टी विधानको धारा २४ को नयाँ व्यवस्थाअनुसार विभाग, समिति गठनको अधिकार कार्यसमितिलाई दिएको बताउँछन् । “पहिले अध्यक्षले गर्न पाउने व्यवस्था थियो । अहिले त्यो व्यवस्था छैन,” उनले भने, “नयाँ विधानले कार्यसमितिलाई अधिकार दिएको छ ।”

पार्टीका प्रवक्ता मोहन श्रेष्ठले विधानको व्यवस्थाबमोजिम विभाग प्रमुखहरूको मनोनयन गर्ने व्यवस्थाअनुसार गरिएको जिकिर गरेका छन् । “जो पार्टीको अध्यक्ष भएर आएकाले पनि, भोलिका दिनमा पार्टी अध्यक्ष हुन्छु भन्नेहरूले पनि र पार्टी सदस्य सबैले बुझ्नुपर्ने कुरा के भने नि राप्रपाको विधानमा विभाग प्रमुखहरूको मनोनयन पार्टी अध्यक्षले गर्ने भन्ने स्पष्ट व्यवस्था छ, कुनै समितिको बैठकले गर्ने होइन,” श्रेष्ठले सामाजिक सञ्जालमा लेखेका छन् ।

उनले विगतको अभ्यासले पनि अध्यक्षले नै जिम्मेवारी तोक्ने गरेको दाबी गरेका छन् । “विभाग प्रमुख मात्रै होइन विभागका सदस्यहरूको समेत मनोनयन अध्यक्षले गर्ने प्रावधान छ र हाम्रो विगतदेखिको अभ्यास पनि यही छ । पार्टीका जिम्मेवार नेताहरूले आफ्नो असहमति फेसबुकमा राख्ने कामले पार्टीको हित गर्दैन है,” श्रेष्ठले शुक्रबार फेसबुकमा लेखेका छन्, “यसलाई तरंगित बनाउने, भ्रम सिर्जना गर्ने काम वाञ्छनीय हुँदैन ।”