वासिङटन । विश्वका सर्वाधिक धनी व्यक्ति एलन मस्क यतिबेला ट्विटर किन्ने होडमा छन् । यसैबीच उनले आफूले सफलतापूर्वक ट्विटर हासिल गरेमा अमेरिकी पूर्वराष्ट्रपति डोनाल्ड ट्रम्पमाथि प्लेटफर्मले लगाएको प्रतिबन्ध हटाउने घोषणा गरेका छन् ।
यति मात्र नभएर मस्कले ट्रम्पलाई सामाजिक सञ्जालबाट हटाउनु वास्तवमै एकदम मूर्खतापूर्ण निर्णय भएको समेत टिप्पणी गरेका हुन् । उनले ट्विटरलाई ४४ अर्ब डलरमा खरिद गर्ने तय भएको छ तर सम्झौता अझै सम्पन्न नभएको बताइएको छ । यसका लागि आगामी थप तीन महिनासम्म लाग्नेछ ।
फाइनान्सियल टाइम्ससँग कुरा गर्दै उनले ट्रम्पलाई ट्विटरबाट हटाउनुले उनको आवाज बन्द नहुने बरु उल्टै उनको नयाँ सामाजिक प्लेटफर्म, ‘ट्रयुथ सोसल’ मा दक्षिणपंथीहरु माझ व्यापक रूपमा बढ्ने बताएका हुन् ।
मस्कका अनुसार ट्विटरका ५० वर्षीय संस्थापक ज्याक डोर्सी पनि उनीसँग सहमत छन् । उनका अनुसार यो निर्णय नैतिक हिसाबले नै अनुचित थियो र चरम मूर्खता थियो ।