यही वैशाख ३० गते स्थानीय तहको निर्वाचनका लागि मतदान हुँदैछ । जनसाधारणको नजिकको राज्यको एकाइ स्थानीय सरकार नै हो । स्थानीय तहमा असल र योग्य व्यक्ति निर्वाचित भए जनताले पाउने सेवा र सुविधा बढ्न सक्छ भने प्रभावकारी पनि हुनसक्छ ।   
 
मतदाताले विवेक प्रयोग गर्न नसके गलत व्यक्ति निर्वाचित हुन्छ । त्यस्तो व्यक्तिले निजी स्वार्थका लागि स्थानीय तहको स्रोत साधनको दुरुपयोग गर्छ भने सार्वजनिक सम्पत्ति पनि हिनामिना गर्छ । यस्ता बग्रेल्ती उदाहरण विगतमा प्रकट भइसकेका छन् ।
 
मतदानका दिन भएको गल्तीका कारण जनताका वास्तविक समस्या बेवास्ता गरेर विगतका कतिपय जनप्रतिनिधिले ५ वर्ष बित्थामा खेर फालिदिए । फेरि पनि त्यसरी नै समय खेर जान नदिन मतदाताले पनि विवेक र सुझबुझ प्रयोग गर्नुपर्छ ।
 
उमेदवारको निष्ठा र आचरण उसको चरित्र निर्धारण गर्ने महत्त्वपूर्ण आधार हुन् । चरित्रहीन व्यक्तिहरूले पटकपटक निष्ठा पनि परिवर्तन गरेको देखिन्छ । आफ्नो सबैभन्दा नजिकको सरकार निष्ठाहीनहरूका हातमा जिम्मा दिनु आत्मघाती मूर्खता हुन्छ । 
 
 यसैगरी विचार, वचन र कर्ममा समेत अहि‌ंसक, लोकतान्त्रिक र इमानदार व्यक्ति नै योग्य जनप्रतिनिधि साबित हुन्छ । प्रचलित व्यवस्थाप्रति नै आस्था नभएका व्यक्तिले निर्वाचित पदको अधिकार तथा स्रोत साधनको दुरुपयोग गर्न सक्छ ।
 
यसैले मतदान गर्नुपूर्व नै राम्ररी उमेदवार र निजले प्रतिनिधित्व गर्ने दल वा संस्था, समूहको पृष्ठभूमिका सम्बन्धमा पनि ध्यान दिनु जरुरी देखिन्छ । मतदानपछि पछुताउनु नपर्नेगरी मतदाताले विवेक प्रयोग गरून् ।
 
मत पाउन अनुचित प्रलोभन दिने वा देखाउने व्यक्ति निर्वाचित भयो भने मतदाता नै पछुताउनुपर्ने हुन्छ । गोप्य मतदान भएकाले आफ्नो विवेकको निर्धक्क प्रयोग गर्न पाइन्छ । कसैसँग डराउन वा तर्सन पर्दैन ।  
 
इमानदार, राजनीतिक निष्ठामा खोट नभएको र चरित्रमा दाग नलागेको उमेदवारलाई मतदान गरौँ । स्वतन्त्र मतदाताले उमेदवारको राजनीतिक एवं वैयक्तिक पृष्ठभूमि र पहिचान पनि हेर्नुपर्छ । 
 
क्षणिक आवेग वा प्रलोभनका कारण अभद्र, दुराचारी वा हिंसक प्रवृत्तिका  व्यक्तिलाई मतदान गर्नु आत्मघाती गल्ती हुनेछ । नबिर्सौँ, मतदाताले अहिले विवेक देखाउन सकेमात्र पछि पछुताउनु पर्नेछैन ।