काठमाडौं । सत्तारूढ नेपाली कांग्रेसका नेता रामचन्द्र पौडेलले गठबन्धनभित्रका मानिसहरूलाई उकासेर गठबन्धन कमजोर बनाउने खेल भइरहेको आरोप लगाएका छन् । शुक्रबार काठमाडौंको शान्तिबाटिकामा भएको गठबन्धनको चुनावी कार्यक्रमलाई सम्बोधन गर्दै उनले गठबन्धन कमजोर भए केपी ओली बलियो हुने र त्यहीँ खेल भइरहेको दाबी गरे ।

उनले गठबन्धन संविधानको माग र राष्ट्रिय आवश्यकता भएको पनि बताए । 

नेता पौडेलले वर्तमान गठबन्धनको खिलाफ ओलीले पनि गठबन्धन गरेको तर ककसलाई गठबन्धनमा आवद्ध गराएका छन् उनीरूको अनुहार हेर्न पनि अनुरोध गरे । 

“केपी ओलीलाई बहुमत दिएर सरकार बनाउनुभयो । उहाँ अस्थितरताको नायक बन्नुभएको छ । मुलुकको सुशासनमाथि प्रहार गर्नुभयो,” उनले भने, “यो गठबन्धनको मिसन परिवर्तन र अग्रमनलाई बचाउने हो । यो प्रगतिशील गठबन्धन हो ।”

उनले थपे, “आज केपी ओलीलाई बलियो बनाउन गठबन्धनलाई कमजोर बनाउने काम भएको छ । गठबन्धनभित्रको मानिसहरूलाई रुखमा भोट हाल्दिन, हसिया हथौडामा मत हाल्दिन भनेर उस्काइएको छ । लकिरको फकिर समाएर गठबन्धन कमजोर बनाउने काम भएको छ ।” 

उनले राजनीतिक स्थायित्व दिन गठबन्धन बनेको बताए । देशले स्थिरता नपाएर विकास हुन नसकेको भन्दै उनले स्थिरतामाथि किन प्रहार हुन्छ ? भन्दै प्रश्न गरे ।