स्थानीय तहको चुनावले राजनीतिक तापक्रम नेता कार्यकर्ताकाे धपेडी बढाएको छ । चुनावै गर्मी याममा परेकाले धर्तीको तापक्रम त यसै बढ्ने नै भयो । चुनावी धपेडी मौसमी गर्मी दुवै सँगै बढ्दा जनजीवन जोखिममा पर्न सक्छ ।  

त्यसमाथि संसारभर बढ्दै गएको तापक्रमको प्रभावबाट नेपाल पनि जोगिन सकेको छैन । विश्व तापमान बढाउने कुकाममा नेपालको हात पटक्कै नभए पनि छिमेकमै संसारकै ठूला प्रदूषकहरू छन् । छिमेकको पापको फल नभोगी सुखै छैन ।

यसैले जल तथा मौसम विज्ञान विभाग र स्वास्थ्य तथा जनसङ्ख्या मन्त्रालयले गर्मीको असरबाट जोगिनका लागि सावधानी अपनाउन जनतालाई आग्रह गरेको हुनुपर्छ । चुरे र तराई भेगमा गर्मी निकै बढ्न सक्ने हुनाले ‘लु’ लाग्न सक्छ । 

चर्को गर्मी मानव स्वास्थ्यका हानिकारक हुन्छ । विशेषगरी गर्मी बढ्दा शरीरमा पानीको मात्रा कम भएमा ज्यानै जान सक्छ । पश्चिम तराईका विभिन्न जिल्लामा यस याममा अपेक्षाकृत गर्मीको प्रकोप बढ्ने गर्छ । 

अरू प्रकोपहरूले जस्तै गर्मीको असर पनि अपेक्षाकृत कमजोर समूहमा बढी पर्छ । विशेषगरी बालबालिका र बूढापाकालाई गर्मीले पनि छिटै असर गर्छ । कुपोषित र रोगीहरूलाई गर्मीको प्रकोप सहन झन् कठिन हुन्छ ।

गर्मीमा तातो हावाका कारण वा धपेडी हुँदा पसिना धेरै निस्केर शरीरमा पानीको कमी हुने हुँदा बिरामी परिने हो । त्यसैले सकेसम्म शरीरमा पानी कम हुन नदिन पहिले नै सावधान हुनु बुद्धिमानी हुन्छ ।

गर्मीले असर गरेमा सकेसम्म चाँडै बिरामीको शरीरमा पानी पुग्ने उपाय गर्न विज्ञहरूले सल्लाह दिन्छन् । त्यसका लागि गर्मीले कुनै व्यक्ति बेहोस भएमा पानी छम्कने, शीतल ठाउँमा राख्ने अनि नुन चिनी पानी खुवाउने गर्नुपर्छ । बिरामी तत्कालै सहज अवस्थामा नपर्के सकेसम्म चाँडै नजिकको स्वास्थ्य संस्थामा लैजानुपर्छ । 

हेलचेक्य्राइँ गर्दा ज्यानै जानसक्ने हुनाले सबै सजग रहनु जरुरी छ । बेलैमा पानी नपाएकै कारण कुनै अप्रिय घटना हुन नदिन राजनीतिक दलहरूले सभा जुलुस गर्दा पानीको समुचित प्रबन्ध गर्न प्रथमिकता दिऊन् ।