सुन्दर नगरी गल्कोटको संस्थापक नगर प्रमुख हुन पाउनु आफैँमा गौरवको विषय हो । मलाई २०७४ सालको स्थानीय निर्वाचनमा नै त्याे गौरव प्राप्त भयो । मेरो लोकतान्त्रिक निष्ठा, निरङ्कुश सत्ताविरुद्धकाे आन्दोलनमा खर्चेको मेरो तन, मन, धन, उमेर र गल्कोट एवं यस क्षेत्रको लागि म र मेरो परिवारले  समेत  गरेको पुस्तौनी सेवाको मूल्याङ्कन गरेर मेरो मातृ पार्टी नेपाली कांग्रेसको  केन्द्रीय, प्रदेश , जिल्ला र स्थानीय नेतृत्वले मलाई गरेको विश्वास र गल्कोटे जनताले दिएको न्यानो मायाको पुरस्कार थियो त्याे जिम्मेवारी भन्नुमा मलाई गर्व छ । गल्कोट र गल्कोटवासी जनताको सेवाको लागि पाएको जिम्मेवारी मैले बितेका पाँच वर्षमा इमान र निष्ठापूर्वक पूरा गरेँ भन्ने मलाई लागेको छ ।

परन्तु, नयाँ नगरपालिकाको अपुरो संगठनात्मक संरचना, देशले भर्खर भर्खरमात्र सुरु गरेको संघीयताको अभ्यास, समग्र देशकै निजामती सेवामा भएको पुनर्संरचना र त्यसले व्यवस्थित गर्न तथा उकास्न नसकेको कर्मचारीको उत्साह र मनोबल, जनप्रतिनिधि स्वयंको अनुभवको सीमितता र सीमित साधन स्रोतजन्य बाध्यता तथा जनताको चुलिँदो आकांक्षा  बीच सोचे जति र गर्नुपर्ने जति काम गर्न नसकिएको पनि छ होला । त्यसको लागि मैले गल्कोटे जनता सामु क्षमाप्रार्थी हुनै पर्छ । क्षमा याचनासँगै म के पनि भन्न चाहन्छु भने गर्न नसकिएका र अधुरा कामको लागि मैले मेरो क्षमताले भ्याएसम्म मेरो व्यक्तिगत, पारिवारिक वा अन्य कुनै कारणले  हेल्चक्य्राइँ नगरी र एकपल पनि समय खेर नफाली लगातार लागी नै रहेँ ।  मैले यो पाँच वर्षमा जे गरेँ गल्कोट र गल्कोटबासीकै लागि गरेँ भन्नेमा मलाई आत्मसन्तुष्टि छ ।

यस अवधिमा गल्कोट नगरपालिकाले शिक्षा, स्वास्थ्य, मातृशिशु स्वास्थ, ज्येष्ठ नागरिक सेवा, पर्यटन, पूर्वाधार कृषि, सामाजिक विकासलगायत अन्य क्षेत्रमा उल्लेख्य काम गरेको छ । आर्थिक अनुशासन, वित्तीय सुशासन, सेवा प्रवाहमा सुशासन, शांतिसुरक्षा कायम गर्नु  र लोकतान्त्रिक शासन पद्धतिको संस्थागत विकासमा टेवा पुराउनु हाम्रो यस कार्यकालको मुख्य उद्देश्य रह्यो । फलस्वरूप सुशासन, वित्तीय अनुशासन, भौतिक पूर्वाधार निर्माण, जनतालाई गरिएको सेवा प्रवाहमा सहजीकरणजस्ता मापदण्ड राखेर नेपाल सरकारले गरेको देशभरिका नगरपालिकाहरूको मूल्यांकन र स्तरीकरणमा देशभरमा सातौं र गण्डकी प्रदेशमा दोस्रो स्थानमा रहन सफल भएर पुरस्कृत समेत भयौँ । अथक प्रयास गर्दागर्दै पनि नगरपालिकाको आफ्नै भवन निर्माण (शिलन्यास भैसकेको छ ), केही वार्डहरुमा बाटोघाटो, केही विद्यालयहरूको क्षमता वृद्धि, पर्यटकीय स्थलहरुको सबलीकरण, सुविधा सम्पन्न अस्पताल निर्माणलगायतका कार्य भने पूरा हुन सकेनन् । तर पनि तिनको लागि सुरुआती पूर्वाधार तयार गरिएका छन् ।

लोकतान्त्रिक पद्धतिप्रति निष्ठावान र विकासप्रेमी व्यक्तिले आफ्नो निष्ठाको मूल्यांकन र आफ्नो मानसपटलमा भएका आफ्नो गाउँठाउँ सुहाउँदो विकासको मोडेल लागु गरेर मातृभूमिको ऋण तिरेर  बिश्राम लिन खोज्नुलाई अन्यथा मानिनु हुँदैन । म आफू पनि त्यसबाट टाढा छु भन्दिन । त्यसको लागि उपयुक्त ठाउँ भनेको जनप्रतिनिधि भएर राज्यको स्रोत र साधन परिचालन गर्नसक्ने हैसियतमा पुग्नु नै हो । मैले एकपटक त्यो मौका प्राप्त गरिसकेँ र त्यसमा खरो उत्रेँ भन्ने आत्मबोध मलाई छ ।

मेरो मातृ पार्टी नेपाली कांग्रेस यसपटक अन्य दलहरुसँग सहयात्रा/गठबन्धन गरेर स्थानीय चुनावमा होमिन लागेको छ । आवधिक निर्वाचन, स्वतन्त्र र भयरहित वातावरणमा मतदान र आफ्ना जनप्रतिनिधिको विवेकपूर्ण छनौट लोकतन्त्रका गहना हुन् । प्रजातन्त्रको पुनःप्राप्तिपछि नेपाली जनताले आफ्नो त्यो अधिकारको प्रयोग गर्दै आइरहेका पनि छन् । केही प्रतिकूल परिस्थिति र अवस्थाबाहेक नेपाली जनताले लोकतन्त्रको सहज अभ्यास निरन्तररूपमा गर्दै चुनावमा भाग लिएर प्रतिस्पर्धामा उत्रिएका राजनीतिक दलहरुलाई उनीहरुको योगदानअनुसारको स्थान दिँदै आएका पनि छन् । 

निर्वाचनमा सबै राजनीतिक दलले आआफ्नै घोषणापत्रका आधारमा मत माग्ने र जनताले उनीहरुको स्थान देखाई दिने प्रक्रिया नै सबैभन्दा उत्तम प्रक्रिया भएकोमा कसैको दुई मत नहोला । तर, देश अझै पनि संक्रमणकालीन अवस्थाबाट पूर्णरूपेण मुक्त भई नसकेको र द्वन्द्वकालीन समयमा भएका घटनाको सत्य निरुपण हुन बाँकी रहेको अवस्थामा सक्रिय राजनीतिक दलहरुबीचको सौहार्दपूर्ण मेलमिलाप र गठबन्धनको सम्भावनालाई पूर्णरुपेण निषेध गर्न सकिने अवस्था पनि छैन । त्यसैले हाल सरकारमा रहेका दलहरुबीचमा स्थानीय आवश्यकताअनुसार गठबन्धन गरेर चुनावमा जाने निर्णय स्वागत योग्य नै छ । भलै यसको दीर्घकालीन प्रभावका बारेमा अहिले केही भन्न नसकिएला तर गठबन्धनका नाममा आफ्नो धरातलीय यथार्थ बिर्सेर आफ्नो सामर्थ्यभन्दा ज्यादा दाबी गर्ने र गठबन्धनलाई नै आफ्नो गुमेको वा नभएको शक्ति आर्जन गर्ने माध्यम बनाउने कोसिस गर्नुले राम्रो परिणाम नदिने र कसैको पनि हित नहुने  हुनसक्छ । हाम्रो गल्कोटको सन्दर्भमा हेर्ने हो भने विगतको परिणामलाई सामुन्ने राखेर नेपाली कांग्रेसको नेतृत्वमा विगतमा प्राप्त सफलताको आधारमा समानुपातिकरूपमा गठबन्धनको लागि अन्य पदहरुमा भागबन्डा गर्नु र सबैले चित्त बुझाउनुमा नै सबैको कल्याण छ भन्ने मेरो बुझाइरहेको छ ।

एक कार्यकाल नगर प्रमुख भएर काम गर्दा पाँच वर्षको समय हाम्रो देशको परिस्थितिअनुसार केही उल्लेख्य काम गर्न काफी हुँदोरहेनछ भन्ने आत्मबोध पनि मलाई हुन गयो । त्यही महसुस गरेर नै होला संविधानले पनि स्थानीय जनप्रतिनिधिले एउटै पदमा दुई कार्यकालसम्म रहेर काम गर्न सक्ने व्यवस्था गरेको छ । 

आफूले सुरु गरेका भौतिक र सामाजिक विकासका कामलाई तार्किक निष्कर्षमा पुराएर विश्राम लिने इच्छा सबैको हुन्छ र त्यो जायज पनि हो भन्ने मैले ठानेको छु । इमानदारीसाथ भएर भन्नुपर्दा पहिलो कार्यकाल अनुभवका कारणले पनि सोचेजति गर्न नसकिँदो रहेछ र मलाई यो महसुस पनि भएको छ । त्यसैले अझै एक कार्यकाल गल्कोट नगरपालिकाको प्रमुख भएर आफूले परिकल्पना गरेको सुन्दर र समृद्ध गल्कोटको निर्माणपश्चात विश्राम लिने मनसुवाका साथ यो पटकको निर्वाचनमा पनि मेरो उमेदवारी र विजय उचित छ भन्ने निवेदन गर्न चाहन्छु । यसमा मलाई मेरो मातृ पार्टी नेपाली कांग्रेसका सबै तहको नेतृत्व, गल्कोटे जनता र गठबन्धनका सहयात्री दलहरुको सहयोग र सद्भावना मिल्ने नै छ भन्ने आशा र अपेक्षा पनि मैले गरेको छु ।

(नगर प्रमुख, गल्कोट नगरपालिका, बाग्लुङ)