काठमाडौं । सरु लिम्बुको दुई गोलप्रेरित सशस्त्र प्रहरी बल (एपीएफ)ले बुधबार त्रिभुवन आर्मी क्लबलाई ३–२ ले हराउँदै मुख्यमन्त्री राष्ट्रिय महिला फुटबल प्रतियोगिताको फाइनलमा स्थान बनाएको छ । 

कैलालीको धनगढीमा जारी प्रतियोगिाताको सेमिफाइनलमा एपीएफले सरुको गोलबाट २३औं मिनेटमा अग्रता लिएको थियो । त्यसको ११ मिनेटपछि सरुले एपीएफको अग्रता दोब्बर बनाइन् । ७१औं मिनेटमा सावित्रा भण्डारीले तेस्रो गोल थपिन् । 

८७औं मिनेटमा सपना लिम्बुले गरेको गोलबाट त्रिभुवन आर्मीले पुनरागमनको प्रयास गरेको थियो । इन्जुरी समयमा हेमा चौधरीले अर्को गोल थपे पनि आर्मीलाई खेलमा फर्किन धेरै ढिला भइसकेको थियो । 

उत्कृष्ट प्रदर्शन गरेकी एपीएफकी सरु प्लेयर अफ दी म्याच घोषित भइन् । सरुले ५ हजार रुपैयाँ नगद पाइन् । बिहीवार हुने दोस्रो सेमिफाइनलमा आयोजक वनदेवी युवा क्लब र नेपाल पुलिस क्लबले प्रतिस्पर्धा गर्नेछन् ।