काठमाडौं । नेपाली सेनाले रुसको रोजोबोरोन कम्पनीसँग दुई एमआई–१७ भी–५ हेलिकोप्टर खरिद प्रक्रिया अघि बढाएको छ । रक्षा मन्त्रालयले नेपाली सेनाको मुख्यालय जंगी अड्डालाई स्रोत निश्चित गरिएको पत्र पठाइसकेको छ ।

रक्षा मन्त्रालयका खरिद शाखाका अधिकृत दिनेश शर्माले दुई हेलिकोप्टर खरिद गर्न स्रोतको सुनिश्चितताको पत्र मंगलबार नै जंगी अड्डा पठाएको जानकारी दिए । उनले भने, “हेलिकोप्टर किन्न लागेको हो । डेढ महिनादेखि प्रक्रिया सुरु गरेका थियौँ । जंगी अड्डालाई पत्र पठाइसकेका छौँ ।”

उनले सेनालाई हेलिकोप्टर खरिदका लागि चार अर्ब रुपैयाँभन्दा बढी रकम विनियोजन गरिएको जानकारी दिए । उक्त हेलिकोप्टर आसन्न स्थानीय तह निर्वाचनसहित विपद्, राहत र सेनाको ट्रुप ओसारपसारका लागि प्रयोगमा ल्याइने मन्त्रालयले जनाएको छ । बहुउपयोगी एमआई–१७ भी–५ हेलिकोप्टर सेनाले द्वन्द्वकालदेखि प्रयोग गर्दै आएको छ ।

सेनाले पाँच वर्षअघि नै रुसी एमआई–१७ भी–५ हेलिकोप्टर भित्र्याउने तयारी गरेको थियो । त्यसका लागि सेनाले रुसी कम्पनी रोजोबोरोनसँग सन् २०१७ मै सम्झौता गरेको थियो ।

रोजोबोरोन हेलिकोप्टर बिक्री गर्ने विश्वकै दोस्रो ठूलो कम्पनी हो । रुससँग हेलिकोप्टर खरिद गर्न लागेपछि अमेरिकाले सांकेतिक रूपमा असन्तुष्टि जनाएपछि नेपाल पछि हट्यो । यसबीच रुसी कम्पनीले पटक–पटक सम्झौताका लागि नेपाली सेनालाई पत्राचार गरेको थियो ।

प्रधानसेनापति प्रभुराम शर्माले हेलिकोप्टर खरिद प्रक्रियालाई प्राथमिकतामा राखेका छन् । सोहीअनुसार जंगी अड्डाले मन्त्रालयलाई हेलिकोप्टर खरिदका लागि प्रक्रिया अगाडि बढाउन भनेको थियो ।

उक्त हेलिकोप्टर पुरानै मूल्यमा खरिद गर्न लागिएको मन्त्रालयले जनाएको छ । शाखा अधिकृत शर्मा भन्छन्, “पुरानो सम्झौतामा जे छ, त्यही मूल्यमा किन्न लागेको हो । अब पाँच वर्षमा डलरको भाउमा तलमाथि परी नै हाल्छ । बढी मूल्यमा किन्न लागेको होइन ।”

रुस–युक्रेन युद्धले विश्वको ध्यान खिचेको छ । यही बेला अघि बढेको हेलिकोप्टर खरिद प्रक्रियालाई कूटनीतिक वृत्तमा चासोका साथ हेरिएको छ ।

यही समयमा भारतीय सेनाले पनि रुसँग ४८ वटा हेलिकोप्टर खरिद गर्न लागेको समाचार सार्वजनिक भएको थियो । तर, रुस–युक्रेन युद्धका कारण खरिद प्रक्रिया रद्द भएको भारतीय सञ्चारमाध्यमले जनाएका छन् । भारतले प्रतिरक्षाका लागि चाहिने सामानहरूमध्ये रुसबाट मात्रै करिब ६० प्रतिशत आयात गर्ने गर्छ ।