पेरिस । फ्रेन्च मतदाताहरूले राष्ट्रपतीय दौडका लागि अप्रत्याशित परिणाम आउनसक्ने पहिलो चरणको निर्वाचनमा मतदान गरेका छन् ।

वर्तमान राष्ट्रपति इमान्युयल म्याक्रोँको कट्टर दक्षिणपन्थी उमेदवार मरिन ले पेनसँग कडा प्रतिस्पर्धा हुने देखिन्छ ।

यद्यपि म्याक्रोँ भन्दा पेनको चुनाव प्रचारप्रसार अभियान निकै सशक्त र परिपक्व रहेको छ । बाह्र जना उमेदवारहरूमध्ये दुई जना शीर्षस्थ उमेदवार छनोटका लागि चार करोड नब्बे लाख वैधानिक मतदाताले मताधिकार प्रयोग गरिरहेका छन् । 

चुनावी दौडमा म्याक्रोँले थारै मात्रै समय दिएका छन् । युक्रेनमाथिको रुसको आक्रमणबारे युरोपको प्रतिक्रियामा उनको ध्यान बढी केन्द्रित रहेको थियो । यसपालिको फ्रान्सको राष्ट्रपतीय चुनावको प्रमुख विषय ऊर्जा र अन्य दैनिक उपभोग्य वस्तुहरूको बढ्दो बजार भाउ माथि केन्द्रित रहेको पाइएको छ । 

सन् २०१७ मा म्याक्रोँ दुईवटा ठूला राजनीतिक पार्टीलाई पन्छाएर आफ्नो नयाँ पार्टीलाई सत्तामा पुर्‍याउन सफल भएका थिए । ती ठूला पार्टीका चुनावी हारको चोट अझै राम्ररी निको हुन पाएको छैन । सोसलिस्ट उमेदवार एन्ने हिडाल्गोले आफ्नो अस्तित्व देखाउन कडा परिश्रम गरेकी छन् ।

त्यसैगरी अर्का उमेदवार भ्यालेरी पेक्रेस्सेले रिपब्लिकहरूलाई उत्साहित पार्न सकेको छैनन् ।

तसर्थ अहिले ४४ वर्षीय म्याक्रोँका सामु कडा प्रतिद्वन्द्वीका रूपमा ली पेन र कट्टर वामपन्थी नेता जिन– ल्युक मेलेनचोन रहेका छन् । केही राजनीतिक विशलेषकहरूले त म्याक्रोँले चुनाव हार्नसक्ने समेत भविष्यवाणी गरेका छन् । 

स्थानीय समयअनुसार आइतबार बिहान आठ बजे मतदान सुरु भएको थियो । ठुला सहरहरू पेरिस, लियोँ र मार्सेल्लेमा राति दस बजेसम्म मतदान चालु रहेको बताइएको छ ।

चुनावको अघिल्लो दिन गरिएको मत सर्वेक्षणले ३७ प्रतिशत जनता कसले चुनाव जित्ला भन्नसक्ने स्थितीमा नरहेको देखाएको छ । यो चुनाव कोभिड १९ महामारी र युक्रेन माथिको रुसी आक्रमणको प्रभावमा परेको छ ।

बीबीसीबाट ।