अमेरिकी अनुदान सहयोग परियोजना मिलेनियम च्यालेन्ज कम्प्याक्ट (एमसीसी) सम्बन्धी सम्झौता अनुमोदनका लागि प्रतिनिधि सभामा प्रस्तुत प्रस्तावलाई सरकारले अगाडि बढाएको छ । विडम्बना, सत्ता साझेदार दलकै कार्यकर्ता सम्झौताका विरुद्ध सडकमा विद्रूप ताण्डव मच्चाउँदै छन् ।    
 
सडकमा विरोध प्रदर्शनका नाममा विध्वंश मच्चाइएको छ । सडक पेटी भत्काएर प्रदर्शनकारीले प्रहरीमाथि ढुंगामुढा र गाडी तोडफोडसमेत गरेका छन् । प्रहरीमाथि प्रहार गर्न प्रदर्शनकारीले पेट्रोल बोकेको त तस्बिरसमेत सार्वजनिक भएको छ ।
 
प्रहरीले पनि प्रदर्शनकारीलाई तह लगाउन पानीका फोहोरा, अश्रुग्यास, रबरको गोली प्रहार गरेको छ । प्रदर्शनकारीमात्र होइन सामान्य बटुवालाई समेत प्रहरीले एक्लै पारेर निर्ममतापूर्वक कुटपिट गरेको तस्बिरहरू सार्वजनिक भएका छन् । 
 
सडकमा उपद्रो मच्चाउने प्रदर्शनकारी मूलतः सरकारको प्रमुख साझेदार नेपाल कम्युनिस्ट पार्टी (माओवादी केन्द्र) कै नेता कार्यकर्ता रहेका छन् । सत्तारूढ दलकै नेता कार्यकर्ताले सरकारविरुद्ध सडकमा यसरी उपद्रो मच्चाउने गरेको उदाहरण बिरलै भेटिन्छ ।  
 
सत्ता साझेदार माओवादी केन्द्रका अध्यक्ष पुषपकमल दाहालले  प्रदर्शनकारीको समर्थन गर्दै प्रहरीले दमन गरेको आरोप लगाएका छन् । सरकारमा बसेर विरोध प्रदर्शन उक्साउने उनको द्वैध चरित्रका कारण स्थिति थप तनावग्रस्त हुने जोखिम देखिन्छ । 
 
अर्कातिर, विपक्षी दल नेकपा (एमाले)का अध्यक्ष खड्गप्रसाद ओलीले भने प्रदर्शनकारीले प्रहरीमाथि गरेको ढुंगामुढा गर्दा पनि प्रतिकारको आदेश नदिएको भन्दै सरकारको आलोचना गरेका छन् । यद्यपि, एमाले एमसीसीका सम्धन्धमा अझै मौन नै रहेको छ ।
 
माओवादी कार्यकर्ताले विरोध प्रदर्शनमा उत्रेसँगै सडकमा टायर बाल्न र सडक भत्काउन पनि थालेका छन् । टायरको विषालु धुवाँ मानव स्वास्थ्यका लागि हानिकारक हुन्छ । तर, राजनीतिक उन्मादीहरूलाई जनस्वास्थ्यको चिन्ता किन हुन्थ्यो ?
 
नेपाली कांग्रेसका केही नेता सत्ता गठबन्धन जोगाउन दौडधुप गर्दैछन् भने सडकमा सबै खेमाका पूर्व माओवादीहरू एकजुट भएका छन् । अहिले राजावादी भनिने पूर्वमण्डलेहरू पनि  माओवादीसँगै सडकमा उत्रिएका छन् ।
 
वास्तवमा नयाँ बानेश्वर क्षेत्रमा सोमबार दण्डहीनताकै विद्रूपता प्रकट भएको हो । प्रहरीलाई ढुंगामुढा गर्न सडक भत्काउने वा पेट्रोल बम बोकेर हिँड्नेमाथि प्रचलित कानुनबमोजिम कारबाही हुने हो भने यस्तो अराजकता मच्चाउने र उक्साउनेहरू हतोत्साही हुनेछन् । 
 
यसैले नेपाल प्रहरीले सबैभन्दा पहिले सडकमा तोडफोड, विध्वंश र आगजनी गर्नेहरूमाथि कानुनी कारबाही गरी सजाय दिलाउन खुट्टा नकमाओस् । प्रधानमन्त्री शेरबहादुर देउवाले सत्ता साझेदार दलका नेतालाई जिम्मेवार हुन चेतावनी देऊन् ! नत्र, अराजकताको आगोले डँडेलाको रूप लिनेछ ।