मोन्ट्रियल । क्यानडाको राजधानी ओटावामा प्रदर्शनरत ट्रक व्यवसायीहरूलाई हर्न बजाउनुका कारण त्यहाँ हो–हल्ला बढेको भन्दै त्यस्तो काम नगर्न आदेश दिइएको छ । तिनीहरूले क्यानडाली सरकारको सबैले अनिवार्य रूपमा कोभिड १९ विरुद्धको खोप लगाउनुपर्ने नियमको विरोध गर्दै आएका छन् ।

धेरै दिनदेखि तिनीहरूले सडक अवरुद्ध गर्दै आ–आफ्ना ट्रक तेर्साएर, निरन्तर हर्न बजाउँदै त्यहाँ पार्टीसमेत मनाउँदै आइरेहका छन् ।

न्यायधीश ह्युग म्यालियनले भनेका छन्, "मैले जानेसम्म कुनै विचारको अभिव्यक्ति गर्ने शैली हर्न फुकेर हैन । आगामी दस दिन सम्मका लागि सम्पूर्ण प्रदर्शनकारीलाई हर्न नबजाउन आदेश दिन्छु ।"

करिब ४ देखि ५ सय वटा ट्रकले यसरी लगातार हर्न बजाउन थालेपछि स्थानिय वासिन्दा र व्यवसायीहरू आक्रोशित भएका छन् ।

अमेरिकी सीमा पार गर्न कोभिड १९ खोप लिएकै हुनुपर्ने नियम विरुद्धको ‘फ्डिम कन्भ्वय’ नामक यो आन्दोलन अहिले क्यानडाका अन्य थुप्रै सहरमा पनि फैलिसकेको छ । 

कोरोना भाइरस पोजिटिभ भएको कारण अहिले आफैँ आइसोलेसनमा रहेका क्यानडाली प्रधानमन्त्री जस्टिन ट्रुड्युले तिनीहरूका यस कार्यले सत्य र सम्झनाकै अपमान भइरहेको प्रतिक्रिया जनाएका छन् ।

सुरुमा ओटावाको प्रदर्शनमा ३ हजार ट्रक र १० देखि १५ हजार प्रदर्शनकारीको सहभागिता रहेको थियो । 

सोमबार ओटावाका गभर्नरले त्यहाँ संकटकाल स्थितिको घोषणा गरेका थिए ।

बिजनेस इन्साइडरबाट ।