दलाली शब्द हाम्रो समाजमा गाली बनेको छ । कुनै पनि व्यक्तिलाई दलाल भनिदिएको खण्डमा उसको सामाजिक प्रतिष्ठामा आँच आउँछ । कसैले पनि सम्पत्ति कमाएको छ भने दलाली गरेर कमाएको भन्दा त्यो पैसा अनैतिक रुपमा कमाएको भन्ने बुझिन्छ । तर, कुनै पनि आधुनिक समाजमा दलाल कम भएको कारणले मूल्य बृद्धि हुन्छ, बजारमा थोरै व्यक्तिको एकाधिकार हुन्छ र सर्वसाधारणले प्रतिस्पर्धात्मक मूल्यमा बजारमा सामान पाउँदैनन् । वास्तवमा दलाल भनेका बजार निर्माणकर्ता हुन् । जहाँ दलाल कम हुन्छन् त्यहाँ बजार बन्दैन र उत्पादनका सामानमा एकाधिकार भएका केही व्यक्तिले धेरै मूल्यमा थोरै व्यक्तिलाई सामान बेच्छन् र गरिबलाई अप्ठेरो परेको समयमा महंगो ब्याजमा ऋणमा लगानी गरेर थप गरिब बनाउँछन् । यदि सानो भन्दा सानो बजारमा धेरै भन्दा धेरै व्यक्तिको प्रतिस्पर्धा हुने हो भने बजारमा सामानको आपूर्ति सहज हुने र जथाभावी मूल्यमा सामान खरिद गर्ने विवशता हुँदैन । 

नेपालमा दलाल भनेर साधारण बजार निर्माणकर्तालाई बुझिँदैन । जसले अनैतिक रुपमा किसानलाई अप्ठेरोमा पारेर तिनको उत्पादन सस्तो मूल्यमा किन्छ र जसले किसानलाई सीधै बजारसम्म पुग्न नदिन गुण्डागर्दी र धम्की दिन्छ त्यस्तालाई दलाल भनिन्छ । त्यस्तै, जग्गाको मूख्य मालिकसँग कौडीको दाममा बैना गर्ने अनि परल मूल्य भन्दा धेरै बढीमा जग्गा बेचेर अनैतिक सम्पत्ति जोड्छ त्यस्तालाई दलाल भनिन्छ । त्यस्तै, कुनै जागिर लगाइदिन्छु भनेर वा विदेश पठाइदिन्छु भनेर अनधिकृत व्यक्तिले पैसा उठाएर गरिबलाई बिल्लीबाठ बनाउँछ त्यस्तालाई दलाल भनेर बुझिन्छ । तर, यी सबै परिभाषा गलत हुन् । यस्तो काम गर्ने मानिसलाई ठग, बदमास, जालसाज वा धोखेबाज भनिनु ठिक हुन्छ । यिनीहरू कुनै पनि रुपमा दलाल होइनन् । तर, नेपाली समाजले दलाल भन्ने शब्दको गलत अर्थ लगाइदिएको कारणले बिचौलिया वा दलालको रुपमा काम गर्नका लागि धेरैले असहज मान्ने र यस्तो काम गरेपछि बदमासी गर्दा पनि अप्ठेरो नमान्ने चलनका कारणले नेपालमा सधैं गरिबहरू बढी मात्रामा मूल्यबृद्धिको मारमा पर्दछन् ।

किसानबाट खरिद गर्ने, ठूलो होलसेलर, सानो होलसेलर, कृषि उपज बिक्रेता, सडकमा तरकारी बेच्ने आदि सबै दलाल हुन् । एकजनासँग किनेर अर्कोलाई बेच्ने सबै नै दलाल हुन् । मोटर विदेशबाट ल्याएर नेपाली बजारमा बेचे पनि वा कपडा किनेर बेचे पनि दलाली नै हो । यस्ता विक्रेताको संख्या जति बढ्छ त्यति प्रतिस्पर्धा बढेर मूल्य बृद्धिमा नियन्त्रण हुने हुनाले यस्ता उद्यमीको संख्या बढाएर जानु पर्दछ । तर, नेपालमा स्थापित व्यापारीहरूले प्रतिस्पर्धीलाई प्रवेश गर्न नदिनका लागि अनेक जालझेल गर्छन् र जनतामाझ पनि दलाली भनेको गलत पेशा हो भन्ने भ्रम सिर्जना गर्ने कोसिस गरिरहेका हुन्छन् । नेपालमा यदि मूल्य बृद्धिमा नियन्त्रण गर्ने र उपभोक्तालाई बढी भन्दा बढी विकल्प दिने हो भने दलालको संख्या पनि बढ्नु पर्दछ र सामाजिक स्विकार्यता पनि बढनु पर्दछ ।