शेरबहादुर देउवा नेतृत्वको नेपाली कांग्रेस कतिपय अवस्थामा असक्षम वा आर्थिक रुपमा स्वच्छ नभएको आरोप लाग्दालाग्दै पनि नेपालको राष्ट्रिय हितको विषयमा भने स्पष्ट देखिन्छ । जसरी आवधिक निर्वाचन, लोकतन्त्र र जनताको अधिकारका विषयमा नेपाली कांग्रेस कहिल्यै कुनै सम्झौता गर्न सक्दैन त्यसैगरी नेपालको सार्वभौमसत्ताको रक्षाका लागि पनि यो दलले सम्झौता गर्दैन भनेर मिलेनियम च्यालेन्च कम्प्याक्टको समर्थनमा स्पष्ट उभिएर देखाएको छ । यही दलको नेतृत्वमा रहेका नेकपा एकीकृत समाजवादी तथा नेकपा माओवादी केन्द्र भने देशका लागि हित र अहितभन्दा एक प्रकारको दिग्भ्रममा रहेका र कुनै बाह्य शक्तिको स्वार्थ परिपूर्ति गर्न लागिपरेको देखिएको छ । 

अहिले अमेरिकी संस्था मिलेनियम च्यालेन्ज कर्पोरेशनले नेपाललाई उपलब्ध गराउने भनिएको करिब ६० अर्ब रुपैयाँका सन्दर्भमा धेरैले यो सहयोग लिएको खण्डमा नेपालले आफ्नो स्वाधिनता गुमाउने भ्रम छरिरहेका छन् र गठबन्धनका दुई सदस्य दल समाजवादी तथा माओवादी पनि यो विषयमा स्पष्ट अडान लिन नसक्ने अवस्थामा पुगेका छन् । यी दुई दलले आफ्नो राजनीतिक बर्चस्व कसरी कायम राख्ने भन्ने स्पष्ट धारणा बनाउन नसक्दा यस्तो भ्रमको खेतिबाट पोषित भएका देखिन्छन् । यदि भ्रममा नपरी नेपालमा आउने सहयोगको विरोध गरेका हुन् भने बाह्य शक्तिको दबाबमा परेको बुझ्नुपर्ने हुन्छ ।  

अर्कोतर्फ, एमसीसीलाई कारण बनाएर प्रमुख प्रतिपक्षी दल नेकपा एमाले अहिलेको गठबन्धनलाई भत्काउन चाहन्छ । आफू सरकारमा हुँदा एमसीसी पास गर्न कोशिस गर्ने एमाले अहिले विपक्षमा हुँदा सत्ता गठबन्धनले पास गरेर देखाओस् भनेर अड्को थाप्दै छ । यदि एमसीसीकै कारणले यो गठबन्धन भत्किन पुग्यो भने समाजवादी र माओवादी दुवै दललाई राजनीतिक लाभ भन्दा अस्तित्वको संकट हुनसक्ने आकलन सहजै गर्न सकिन्छ । त्यस अवस्थामा एमसीसीमा लिएको अडानका कारण ठूलो जनसमर्थन प्राप्त हुने सम्भावना निकै क्षीण देखिन्छ । 

यदि देशको सार्वभौमिकता र अक्षुण्णताका लागि यी दुई दलले आफ्नो अडान कायमै राखेका हुन् भने त्यो झन् ठूलो दिग्भ्रम हो । अहिले नेपालको सार्वभौमसत्ता र अक्षुण्णतालाई कतैबाट डर छ भने दुई ठूला उत्तरी र दक्षिणी छिमेकीबाट हो । अहिलेसम्म यि दुवै देश एक अर्काका मित्रशक्ति नभएको कारणले यिनीहरूको बीचमा बस्दा नेपाललाई ठूलो समस्या भएको छैन । यदि यि दुई देश मिलेभने नेपालको सिमानाभित्र रहेको लिपुलेकबाट व्यापारिक मार्ग बनाउने सम्झौता गर्न सक्छन् भन्ने प्रमाणित भइसकेको छ । यो विषयमा नेपालले विरोध गर्दागर्दै पनि विवश भएर बस्नु परेको छ । यस्तो अवस्थामा विश्वको अर्को ठूलो शक्तिले नेपालको पक्षमा बोलिदिने हो भने बल्ल नेपाल एउटा देशको रुपमा सशक्त र सम्मानपूर्वक बाँच्न पाउँछ । अमेरिका नेपालका लागि त्यही शक्ति बनोस् भन्नका लागि पनि एमसीसी स्वीकार गर्ने र अमेरिकालाई नेपालको मित्र बनाउने कार्य नेपालको हितमा छ । एमसीसीमा जे जस्तो सर्त भएता पनि ती सर्त आयोजनाका लागि मात्र लागू हुने हो । तथापि, त्यस्तो भएन भने पनि फेरि हाम्रा दुई छिमेकीले अमेरिकालाई नेपालभित्र जथाभावी गर्न दिँदैनन्, अन्यथा उनीहरूकै सुरक्षामा आँच आउँछ । 

त्यसैले, अहिले विश्वको प्रमुख शक्तिसँग मित्रता प्रगाढ बनाउन र नेपालको विकासमा सहयोग हुने एमसीसीको विरोध गरेर राष्ट्रवादी हुनु भनेको घर जलाएर खरानी बेच्नु जत्तिकै बुद्धिमानी हो । नेकपा एकीकृत समाजवादी तथा नेकपा माओवादी केन्द्रको समयमै चेत खुलोस् ।