जनकपुरधाम । धनुषाको मुखियापट्टी मुसरनियाँ गाउँपालिका २ जमुनी खोलामा पुल बनाउँदा भारतीय प्रहरीले अवरोध गरेको छ । नेपाल–भारत सीमाभन्दा सय मिटर भित्र नेपाली भूमिमा पुल बनाए पनि भारतीय सीमा सुरक्षा बल (एसएसबी)ले तत्काल पुल नबनाउन उपभोक्ता समितिलाई निर्देशन दिएको हो । 

एसएसबीले सम्पूर्ण कागजात लिएर गएको उपभोक्ता समितिका अध्यक्ष धनबीर यादवले जानकारी दिए । भारतीय प्रहरीले कागजात माथिल्लो निकायमा पेश गर्ने छन् । माथिको आदेश आएपछि मात्रै पुल निर्माण हुन दिने भारतीय प्रहरीको भनाइ छ ।
 
पुस महिलो साता गाउँपालिका अध्यक्ष मनोज यादवले पुल शिलान्यास गरेका थिए । त्यसको अर्को साता भारतीय प्रहरीको एसएसबी टोली आएर काम रोक्न निर्देशन दिएको अध्यक्ष यादवले बताए । उनका अनुसार किसानलाई आवजावतका लागि ३२ मिटर लामो झुलुङ्गे पुल निर्माण गर्न गाउँपालिकाले बजेट विनियोजन गरेको छ । करसहित ४९ लाखको लागतमा पुल निर्माण गर्ने उपभोक्ता समितिसँग पालिकाले सम्झौता गरेको छ ।
 
किसान रुदल यादवले पुल नहुँदा पानी तरेर जानु परेको गुनासो गरे । “पुल नभएपछि बाढीको बेला आफ्नै खेतमा जान सकिँदैन,” उनले भने, “बाढी नभएको बेला पनि समस्या नभएको होइन । पानी तरेर जाँनु पर्ने हुन्छ । खेतीका लागि मल टाउकोमा बोकेर जानु पर्छ ।” पुल निर्माण भएपछि मिथिला माध्यमिक परिक्रमाको गिरजा स्थान र फलुहर जोड्ने छन् ।

धनुषाका निमित्त प्रमुख जिल्ला अधिकारी प्रर्दशनी कुमारीले कुनै पक्षबाट उक्त विषयमा अधिकारिक जानकारी नआएको बताइन् । “हामीलाई अहिलेसम्म त्यस्तो विषयमा जानकारी आएको छैन । हामी बुझेर समस्या समाधानतर्फ लाग्ने छौं,” उनले भनिन् । वास्तविक कुरा बुझेर मन्त्रालयमार्फत अगाडि बढ्ने उनको भनाइ छ । दुई देशको विषय भएको हुनाले गृह मन्त्रालयबाट समस्या समाधान हुने उनले जानकारी दिइन् ।
  
पालिका अध्यक्ष मनोेज यादवले कुनै निकायलाई अहिलेसम्म जानकारी नगराएको स्वीकार गरे । “भारतीय प्रहरीले कागजात लिए गएको छ । उत्ताबाट के जवाफ फर्काउँछ त्यो अनुसार हामी अगाडि बढ्ने सोचमा छौं,” उनले भने । 

भारतीय प्रहरीले पुनः नबनाउने निर्देशन दियो भने कानुनी रुपमा अगाडि बढ्ने उनले बताए । नेपाली भूमिमा पुल बनाउँदा भारतीयको अवरोध कानुन विपरित रहेको उनको विष्लेषण छ । दशगजा क्षेत्रमा भारतीय प्रहरीले नेपाली नागरिकलाई दुःख दिएको उनको भनाइ छ ।