न सरकारले प्रभावकारीरूपमा खोप वितरण गर्न सकेको छ न जनताले जनस्वाथ्य्यका तोकिएका मापदण्ड नै पालना गरेका छन् । यस्तो अवस्थामा कोभिड-१९ को सङ्क्रमण फेरि फैलियो भने आश्चर्य हुनेछैन । 

भण्डारमा खोप थन्क्याएर जनतालाई महामारीको जोखिममा पार्ने काम सरकारी अधिकारीहरूले जानजान गरेका होलान् भनेर पत्याउन सकिँदैन । तर, सरकारी संयन्त्र विशेषगरी कर्मचारीहरू काम गराइ भने पटक्कै चित्तबुझ्दो देखिँदैन ।

यस्तो अवस्थामा राजनीतिक नेतृत्व विशेषगरी स्वास्थ्य तथा जनसङ्ख्यामन्त्रीले विशेष क्रियाशीलता देखाउनुपर्ने थियो । दुर्भाग्य, महामारी सुरु भए यता स्वास्थ्य मन्त्रालयको जिम्मेवारी पाउने मन्त्रीहरू अधिकांश ‘नालायक’ साबित भए ।

सरकारको विशेषगरी स्वास्थ्य मन्त्रालयको अक्षम र अकर्मण्य नेतृत्वको मार भने नेपाली जनता र अन्ततः अर्थतन्त्रले भोग्नु परेको छ । यस्तो बेलामा कोभिड-१९ को नयाँ प्रकार ओमिक्रोनको सङ्क्रमण पनि भयावहरूपमा फैलियो भने अकल्पनीय अवस्था उत्पन्न हुनसक्छ ।

नेपालमा अहिलेसम्म ओमिक्रोन फैलिइसकेको  देखिएको छैन । तर,  सङ्क्रमित हुने दर बढ्ने प्रवृत्ति देखापरिसकेको छ । हुनत, ओमिक्रोन तीव्ररूपमा फैलिए पनि यसको असर अपेक्षाकृत कम घातक मानिन्छ । तर, ठूलो जनसङ्खाले एक मात्रा पनि खोप नलगाएको नेपालमा यो घातक हुन पनि त सक्छ ।

सरकार जिम्मेवार भएर जनताको जीवन रक्षाका लागि युद्धस्तरमा क्रयाशील हुने अपेक्षा राख्नु नेपालका हकमा ‘मीठो सपना’ मात्रै हो । तैपनि, जनतासँग अरू विकल्प त छैन । यसैले सरकारले सकेसम्म छिटो सकेसम्म नागरिकलाई खोप दिन प्राथमिकता देओस् ।
 
आवश्यक भए सेना र प्रहरी परिचालन गरेर पनि खोप अभियान सफल बनाउनुपर्छ । कम्तीमा सङ्क्रमणविरुद्ध अग्रपङ्क्तिमा खटिने सबैलाई र  ज्येष्ठ नागरिकलगायत जोखिममा रहेको समूहलाई तत्काल अतिरिक्त ९बुस्टर० मात्रा दिइयोस् । पहुँच हुनेहरूलाई चोरेर दिनुको साँटो खोप वितरणमा न्याय पनि होस् । 

परन्तु, सरकारी कर्मचारीको भ्रष्ट एवं गैरजिम्मेवार प्रवृत्ति भोगिसकेका नेपाली जनताले आफूले सक्ने जति सावधानी पनि नअपनाउनु भने मूर्खता हुनेछ । आउने दिनहरूमा सङ्क्रमण तीव्र हुनसक्ने चेतावनी जनस्वास्थ्यविद्हरूले दिइरहेको परिप्रेक्ष्यमा जनता स्वयं सावधान र स्वास्थ्य मापदण्डको पालनामा गम्भीर हुनुको विकल्प छैन ।

फेरि पनि समाजलाई कक्रक्क पार्ने बन्दाबन्दी भोग्ने रहर नभए बेलैमा सावधानी अपनाऊँ । ससाना अप्ठेराहरू सहेर जनजीवन र अर्थतन्त्रलाई सङ्कटबाट जोगाउन नसके कष्टकर भुक्तमान सहन तयार हुनुपर्नेछ ।