सत्तारूढ गठबन्धनको नेतृत्व गर्ने नेपाली कांग्रेसको चौधौं महाधिवेशन बहालवाला सभापति शेरबहादुर देउवालाई नै पुनः निर्वाचित गरेर समाप्त भएको छ । केन्द्रीय समितिका अरू पदाधिकारी र सदस्यहरूको मतगणना हुनमात्र बाँकी हो । तर, चुनाव प्रचारमा गरिएको फोहोर भने सहरका विभिन्न ठाउँमा छरिएको देखिन्छ । 
 
यसो त काठमाडौं त्यसै सफा सहर होइन । त्यसमाथि नेपाली कांग्रेसको महाधिवेशनका क्रममा प्रयोग गरिएको प्रचार सामग्रीले थप फोहोर भएको छ । र, प्लास्टिक मिसिएको कागज सजिलै नष्ट पनि हुँदैन ।
 
प्राकृतिक न्यायको सिद्धान्तअनुसार पनि फोहोर तह लगाउने मूल जिम्मेवारी फोहोर गर्नेकै हुन्छ । सहर सफा राख्ने जिम्मा लिएको निकायले व्यवस्थापन गरे पनि फोहोर हटाउन लाग्ने खर्च प्रदूषकले नै तिर्नुपर्छ ।
 
नेपाली कांग्रेसको चौधौं महाधिवेशनमा धेरै संख्यामा तरुण प्रतिनिधि निर्वाचित भएका छन् भनिएको थियो । प्रचारप्रसारको शैली हेर्दा भने कांग्रेस अझै अगिल्लै शताब्दीमा रहेको देखियो । मतदानको अव्यवस्थाले त झन् पुरानो सिद्ध भयो ।
 
त्यसैले प्रचार प्रसारमा पनि पुरातन शैली र तामझाम अपनाइएको हुनसक्छ । तर, कांग्रेसको यो पुरातन प्रचार शैली अरूको चासोको विषय होइन । पुरातन शैलीको प्रचार सामग्रीले गरेको फोहोर भने जनचासोको विषय  हो । 
 
अहिले काठमाडौंको हावा सास फेर्न योग्य छैन । अर्थात्, प्रदूषित छ । यसैले प्रचार सामग्रीको कागज पोल्नु त हावामा विषै थपेजस्तै हो । प्लास्टिक मिसिएको कागज कुहाएर पनि सजिलै र छिटै नष्ट गर्न सकिँदैन ।
 
यो फोहोर सायद प्रशोधन गरेर पुनः प्रयोग गर्न सकिन्छ । तर, नेपाली कांग्रेसका नेताहरूको सोच र शैली हेर्दा तिनले प्रशोधनको व्यवस्था मिलाउने झन्झट गर्लान् भन्ने  देखिँदैन ।
 
परन्तु, देशको सबैभन्दा पुरानो अनि धेरै समय शासनमा रहेको सत्तारूढ दल नेपाली कांग्रेसले कम्तीमा आफैँले गरेको फोहोर त व्यवस्थापन गर्ला नि भन्ने अपेक्षा गर्नुभने अन्यथा पक्कै हुँदैन । यद्यपि, कांग्रेसले सफा गरेन भने पनि काठमाडौं महानगरपालिकाले त गर्ला नै ।         
 
प्रचारका क्रममा लागि सहरका विभिन्न ठाउँमा झन्डाहरू पनि टाँगिएका छन् । तिनीहरू त राम्ररी थन्क्याएर राखे पुनः प्रयोग पनि गर्न सकिनेछ । यसतर्फ पनि कांग्रेसका नेताहरूले ध्यान दिनु मनासिव हुनेछ ।