नेपाली कांग्रेसको महाधिवेशन उद्घाटन समारोहका सबैजसो वक्ताले कांग्रेसप्रति अपेक्षा राखेको देखियो । सत्ता साझेदारहरूले त राख्ने नै भए प्रमुख विपक्षी नेताले समेत देश बनाउन कांग्रेससँग सहकार्यको प्रस्ताव गरे । 

नेपाली कांग्रेसप्रति सबैको अपेक्षा हुनु कांग्रेसजनका लागि गर्वको विषय पनि हो । परन्तु, त्यस्तो अपेक्षा पूरा गर्ने नेतृत्व चयन गर्नसक्नु कांग्रेसका लागि चुनौती पनि हो । 

महाधिवेशन प्रतिनिधिमा थोरै जनामात्र निर्विरोध निर्वाचित भएका होलान् । अधिकांशले त ६(७ वटा निर्वाचनको सामना गर्नुपरेको छ । त्यसक्रममा तल्ला तहदेखि नै समूहगत विभाजन भएको थियो ।

उमेदवारी समूहगत भए पनि परिणाम भने मिश्रित देखिएको छ । अधिकांश शिक्षित तरुण उमेदवार बढी मतसहित विजयी भएका छन् । यसले नेपाली कांग्रेसका तल्ला तहका कार्यकर्ताको सुझबुझ प्रकट गरेको छ ।

केन्द्रमा पनि उमेदवारी समूहगतरूपमै पर्न सक्छ । चर्को गुटबन्दी त केन्द्रमै छ । सात तहको प्रतिस्पर्धाको अनुभवपछि पनि महाधिवेशन प्रतिनिधिहरूले यही गुटबन्दीलाई नै स्वीकृति दिए भने त्यो कांग्रेस र देशका लागि दुर्भाग्य हुनेछ । 

महाधिवेशन प्रतिनिधिहरूले गुटबन्दीको बेफाइदा पक्कै थाहा पाइसके होलान् । नेपाली कांग्रेसको सर्वोच्च निकाय महाधिवेशनका प्रतिनिधिले २०७४ को कटु यथार्थ अहिल्यै त पक्कै बिर्सेका छैनन् होला ।

महाधिवेशनले गुट भत्काउने अवसर दिएको छ । विवेक प्रयोग गरेर योग्य, इमानदार र असल उमेदवार छान्न सके सम्भवतः गुटबन्दी सधैँका लागि समाप्त हुनेछ । वैयक्तिक लाभ र प्रभावकै लागि मोलतोल गर्नेहरू परास्त हुनेछन् । 

कांग्रेसको चौधौं महाधिवेशनका प्रतिनिधिहरूले विवेक प्रयोग गरेर गुटबन्दी समाप्त गरे भने इतिहासमा उनीहरूको उच्च मूल्याङ्कन हुनेछ । यसैगरी, गुट बलियो बनाए भने पार्टीको अवश्यंभावी अधोगतिको दोषभागी हुनुपर्नेछ ।  

नेपाली कांग्रेसलाई राष्ट्रको अपेक्षा पूरा गर्ने पार्टी बनाउने हो भने महाधिवेशन प्रतिनिधिहरूले विवेक प्रयोग गरेर निर्णय गरुन् । निर्णय गर्न कठिन भए अन्तरात्माको आवाज सुन्ने बीपीको सल्लाह पालन गरेहुन्छ । तर, विवेकहीन निर्णय नगर ! 

यसपटक नेतृत्व चयनमा महाधिवेशन प्रतिनिधिले देखाउने विवेक र सुझबुझले पार्टीको मात्र होइन देशकै भविष्य प्रभावित हुन्छ । महाधिवेशन मूलतः नेतृत्व चयनमा सीमित तथा केन्द्रित भएकाले निर्वाचन परिणाममा देखिने विवेक नै यसको सफलताको कसी हुनेछ ।