महाधिवेशनका नाममा नेताहरू भिड जुटाउन र देखाउन व्यस्त छन् । उनीहरूको यही मूर्खताका कारण कोभिड-१९ को महामारी फैलने डर फेरि बढेको छ ।

देशभित्र दिनहुँ सङ्क्रमितभन्दा सङ्क्रमणमुक्त हुनेको सङ्ख्या केही बढी भए पनि सङ्क्रमण रोकिएको छैन । यसैबीच दक्षिण अफ्रिकामा कोभिड-१९ को नयाँ प्रकार देखिएको समाचारले विश्व स्वास्थ्य स‌ङ्गठनले समेत सावधान गराइसकेको छ ।

कोभिड-१९ विरुद्धको खोप अभियानको प्रगति निराशाजनक नभए पनि विभाजन कायमै छ । गाउँका गरिब र अपेक्षाकृत पहुँच नहुनेहरूले अझै पनि खोप पाएका छैनन् । 

खोप नपाएकाहरूलाई खोजेर खोपाउने परम्परा सरकारी संयन्त्रमा छैन । खोप केन्द्रसम्म पुग्ने नसकेर खोप लगाउन नपाउनेहरू आफू सङ्क्रित भएर सजिलै सङ्क्रमणका कारक बन्नसक्छन् ।  

उता देशका सबै ठूला राजनीतिक दलको महाधिवेशन भइरहेको छ । नेकपा (एमाले)कै शैली अरू दलले पनि अपनाए भने एकैपटक सङ्क्रमण देशव्यापी र भयावह हुनसक्छ ।

गएको वर्ष सङ्क्रमण अपेक्षाकृत मत्थर भइसकेका बेला राजनीतिक दलहरूले भिडभाड प्रदेशन गरे । त्यसपछि सरकारले लामो समयसम्म निषेधाज्ञा लागू गरेको थियो ।

कोभिडको नयाँ स्वरुप ‘ओमिक्रोन’को अध्ययन भइरहेकाले संसारका विभिन्न देशले आवतजावतमा पुनः कडाइ गरेका छन् । नेपालमा भने भिड बटुल्ने होड सुरु गरिएको छ । 

अहिले पनि त्यही अवस्था दोहोरिने खतरा कायमै छ । सरकार वा राजनीतिक नेतृत्व जिम्मेवार भइदिने हो भने जनताले सामान्य सावधानीमात्र अपनाएर दैनिक कामकाज गर्न पाउँथे ।

सरकार र विशेषगरी राजनीतिक नेताहरू गैरजिम्मेवार भएकाले जनताले नै बढी सावधानी अपनाउनु जरुरी देखिन्छ । विशेषगरी विद्यालय, सार्वजनिक यातायात, बजार, कलकारखानाजस्ता भिडभाड हुने क्षेत्रमा पूर्ण सावधानी अपनाऊँ ।

केन्द्रीय महाधिवेशन गर्न बाँकी नेपाली कांग्रेसलगायतका दलका नेताले पनि एमालेको सिको गरेर भिड देखाउनुको साटो स्थितिको गम्भीरता बुझेर संयम र सुझबुझ अपनाउन् । सत्तामा हुनेहरू बढी जिम्मेवारी हुनु पनि त पर्छ नि !