संसद्को सबैभन्दा ठूलो प्रमुख विपक्षी दल नेपाल कम्युनिस्ट पार्टी (एमाले)को दसौं महाधिवेशनको शुक्रवार चितवनमा भव्यरूपमा उद्घाटन भएको छ । उद्घाटन समारोहको भव्यताले प्रतिस्पर्धी दलका नेताहरूलाई ईर्ष्या नै लागेको हुनुपर्छ ।

समारोहको भव्यताबाट उद्घाटनको प्रत्यक्ष प्रसारण हेर्ने दर्शकलगायतका सर्वसाधारण चकित भएका छन् । एमालेका नेता, कार्यकर्ता र शुभेच्छुक पक्कै पनि उत्साहित भएको हुनुपर्छ । यद्यपि, बन्द सत्र र निर्वाचन परिणाम पनि अपेक्षाअनुरूप भएमात्र उनीहरूको उत्साह दिगो हुनेछ ।

उद्घाटन समारोह हेर्दा एमालेका अध्यक्ष खड्गप्रसाद ओलीप्रति आकर्षण बढेको पनि स्पष्टै देखिन्छ । यसले जनस्तरमा एमालेलाई कति लाभ हुन्छ भन्ने भने आगामी निर्वाचनमा नै परीक्षण हुनेछ ।

संस्थापक नेताहरू अलग्गिँदा र सत्ता गुमाउनुपर्दा समेत एमालेको सान र साख बचाउनमात्र होइन बढाउनसमेत सफल देखिएका अध्यक्ष ओली पुनः अध्यक्ष हुने पनि निश्चितै छ । यसैले महाधिवेशनपछि पनि एमालेको नीति र देशको राजनीतिमा खासै अन्तर भने पर्ने देखिँदैन ।
  
एमाले महाधिवेशन सम्भवतः सबैभन्दा ठूलो राजनीतिक भेला हुनपुग्यो । कम्युनिस्ट पार्टीको परम्परागत शब्दाडम्बर खासै नदोहोरिनु पनि एमाले महाधिवेशनको नयाँ पक्ष हो । एमालेका नेताहरूले यही शैली कायम राख्न सके भने नेपालको राजनीतिमा यसबाट सकारात्मक प्रभाव नै पर्नेछ ।  

कहिल्यै मिलेर बस्न नसक्ने नेपालका कम्युनिस्ट नेताहरूलाई देशी विदेशी शक्तिले फुटाएको भन्नु हास्यास्पद हुन्छ । यद्यपि, केही कम्युनिस्ट नेताहरूका लागि यो भ्रम थेगो नै बनेको छ । एमाले महाधिवेशनको उद्घाटन समारोहले पनि यो हास्यापद पाखण्डलाई आधारहीन सिद्ध गरिदिएको छ ।

नेतृत्व चयनमा विधानको पालना हुने र लोकतान्त्रिक प्रक्रिया अपनाइयो भने एमालेको लोकतान्त्रिक साखमा वृद्धि हुनेछ । अहिलेको अवस्था हेर्दा अध्यक्ष ओलीले चाहेमात्र पार्टीभित्र लोकतान्त्रिक प्रक्रिया पनि अभ्यास हुनसक्ने देखियो । सम्भवतः अध्यक्ष ओली अहिले एमालेमा कम्युनिस्ट पार्टीमा भनिनेजस्तो ‘प्राधिकार’ बन्न पुगेका छन् ।

एमाले महाधिवेशनमा लागेको भिडका कारण बिरामी बोकेको एम्बुलेन्ससमेत ६ सडकै रोकिएको घटना अस्तव्यस्तताको उदाहरण पनि बन्न पुगेको छ । यस्तै अस्तव्यस्तता र तामझाम एवं व्यक्तिपूजाको भने अरू दलले कहिल्यै सिको नगरेकै बेस हुन्छ ।

नेपाल कम्युनिस्ट पार्टी (माओवादी केन्द्र)सँग एकीकरण गरेर नेकपा (नेकपा) बनेपछि एमालेका नेता कार्यकर्ताको एउटा पङ्क्तिमा बढी ‘लाल’ देखिन थालेको थियो । अहिले, अध्यक्ष ओली र उनको समूह अपेक्षाकृत बढी गेरुवा हुनपुगेको देखिन्छ । यस्ता ‘अति’हरू देश र जनताका लागि हानिकारक हुन्छन् ।

दसौं महाधिवेशनपछि नेकपा (एमाले) इमानदार, पाखण्डरहित, देशप्रति जिम्मेवार जनमुखी राजनीतिक दल बन्न सकोस् । महाधिवेशन निर्विघ्नतापूर्वक सफल होस् भन्ने शुभकामना !