आआफ्ना दलका आसन्न महाधिवेशनमा पार्टी कब्जा गर्न अर्जुन दृष्टि राखेर अगाडि बढेका  सत्तारूढ र विपक्षका नेताहरूलाई हुम्लाको भोकमरीको खबरले खासै छोएन । त्यसो त ‘ठूला’ नेताहरूले बेवास्ता गरेकैले विकट हुम्लाबाट हुम्ली जनप्रतिनिधि संघीय राजधानी काठमाडौं आउनु परेको हो ।

हुम्लामा बर्सेनि खाद्यान्नको अभाव हुन्छ । पञ्चायत कालदेखि नै राज्यले देशका दुर्गम भेगमा मूलतः ढुवानीमा अनुदान दिएर खाद्यान्न आपूर्ति गर्दैआएको छ ।  विडम्बना, आधा शताब्दीभन्दा बढी समय भइसके पनि अभावको समाचार बर्सेनि दोहोरिन्छ ।

मूलतः विकट हिमाली जिल्लामा खाद्यान्न आपूर्तिकै लागि सरकारले ‘खाद्य व्यवस्था तथा व्यापार कम्पनी लिमिटेड’ नामको अलग्गै संस्था पनि बनाएको छ । सधैँजस्तै यस वर्ष पनि कम्पनीले बेलैमा खाद्यान्न उपलब्ध गराउन सकेन । 

हुम्लाका लागि पठाउन भनी खरिद गरिएको खाद्यान्न सुर्खेत, धनगढी र नेपालगन्जका गोदामहरूमा थन्क्याइएको छ । एकातिर भोकमरी हुने र अर्कातिर चामल गोदाममै थन्किने अवस्था कम्पनी व्यववस्थापनको निकम्मापन पुष्टि हुन्छ ।

विगत केही वर्ष हुम्लाको उत्तरी भेगमा चीनको बाटोबाट खाद्यान्न पठाउने गरिन्थ्यो । कोभिड (१९ को महामारीपछि भने चीनले नेपालसँग आवतजावत गर्ने अधिकांश नाका बन्द गरेको छ । हुम्लाको उत्तरी भेगमा अहिले उत्पन्न खाद्य सङ्कटको एउटा कारण चीनले नाका बन्द राख्नु पनि हो ।

हेलिकप्टरबाट ढुवानी गर्ने प्रावधान नभएको र स्थलमार्गबाट अहिले ओसार्न नसकिने भएकाले खाद्यान्न पठाउन नसकिएको स्पष्टीकरण खाद्य व्यवस्था तथा व्यापार कम्पनीका कर्मचारीले दिएका छन् । तर, हिउँ पर्न थाल्नुभन्दा पहिले कम्पनीको व्यवस्थापन के हेरेर वा पर्खेर बसेको थियो ? 

सबै तहका सरकारहरूले खाद्य व्यवस्था तथा व्यापार कम्पनीबाट यस प्रश्नको उत्तर माग्नुपर्छ र कम्पनीको व्यवस्थापनलाई तालुकवालाले कारबाही गर्नुपर्छ । तत्कालका लागि भने हेलिकप्टरबाटै भए पनि भोकमरी परेको क्षेत्रमा खाद्यान्न पठाउन प्राथमिकता दिनुपर्छ ।

यस्तै सङ्कट दोहोरिन नदिन स्थानीय तह र प्रदेश सरकारले बेलैमा तयारी गरेको भए अहिलेको सङ्कट पक्कै आइपर्ने थिएन । तर, अहिलेको राजनीतिक र  प्रशासनिक संयन्त्रबाट सायद त्यस प्रकारको तदारुकताको अपेक्षा गर्नु मूर्खता हुनेछ ।

खाद्यान्नको अभावमा एक जना नेपालीको पनि ज्यान गयो भने सत्तामा रहेकाहरूमाथि कहिल्यै नमेटिने कलङ्क लाग्नेछ । र, त्यस अक्षम्य अपराधका लागि नेपाली जनताले कहिल्यै कमा दिनेछैनन् । यसैले तत्काल हुम्लाका साथै खाद्यान्न अभाव भएका क्षेत्रमा तत्काल आपूर्तिको व्यवस्था मिलाऊ !