सार्वजनिक स्थलहरू हुने भिडभाड हेर्ने हो भने कोभिड-१९ को सङ्क्रमण समाप्त भइसकेको भान पर्छ । तर, महामारीकै रूपमा नभए पनि कोभिडको सङ्क्रमण बाँकी नै छ र अझै फैलन सक्छ । 

दिनहुँ घट्दै गए पनि अझै सयौंको हारामारी सङ्क्रमित देखापरिहरेका छन् । यसैगरी सङ्क्रमणबाट मर्नेहरूको संख्या पनि दुई अंकमै छ । अर्थात्, कोभिडको प्रकोप शान्त भइसकेको छैन ।
 
पूरा मात्रा खोप लगाएकाहरू पनि सङ्क्रमित भइरहेका छन् । विदेशबाट आउनेहरू नेपालमा  सङ्क्रमित भइरहेका छन् भने यताबाट जानेहरूमा कोभिड देखिएको छ । यसैले कोभिडको प्रकोप साम्य भएको ठान्नु आत्मघाती हुनक्छ ।

नेपाली समाज भने अलि बढी फुर्के छ । चाडबाड आएपछि सबैले महामारी सकिएजस्तो व्यवहार गरेको देखिएको छ । सामान्य सावधानीसमेत अपनाउनसमेत हेलचेक्य्राइँ गरिएको छ ।

विशेषगरी सार्वजनिक स्थानहरू र यातायातमा चरम हेलचेक्य्राइँ षरिएको हुन्छ । सबैभन्दा धेरै सावधानी अपनाउनुपर्ने अस्पतालहरूमा नै अन्तभन्दा पनि बढी हेलचेक्य्राइँ देखिन्छ । सार्वजनिक यातायात त्यस्तै सङ्क्रमणलाई खेलाँची ठानिने अर्को स्थान हो ।

यसरी नै सङ्क्रमण साम्य भएको ठानेर सावधानी अपनाउन बढी खुकुलो गर्ने धेरै मुलुकमा कोभिडले रूप फेरी फेरी पटकपटक आक्रमण गरिरहेको छ । राम्ररी परीक्षण गरिने हो भने नेपालमै पनि अवस्था अहिले सतहमा देखिएभन्दा गम्भीर हुनसक्छ ।

यसैले सरकार र समाज दुवैले कोभिड-१९ को सङ्क्रमणप्रति सावधान हुन छाड्नु मूर्खता हुनेछ । कम्तीमा बालबालिकालगायत जनसङ्ख्याको ठूलो सङ्ख्यले खोप नलगाउँदासम्म सावधानी अपनाई रहनुपर्ने देखिन्छ ।

बढी भिड हुने ठाउँमा कम्तीमा मास्क लगाउने र सकेसम्म एकअर्काबीच दूरी कायमै राख्न छाड्नु भएन । अस्पतालहरू, विद्यालयहरू, सार्वजनिक सेवा प्रदायक सरकारी निकायहरूमा हुने भिडको मात्रै नियमन हुनसके सङ्क्रमण फैलने जोखिम कम हुन्छ । 

कोभिड-१९ को सङ्क्रमण नियन्त्रणका लागि तयार गरिएका संरचना र संयन्त्रको पनि उपेक्षा भएको देखिएको छ । यस प्रकारको दोहोरो उपेक्षाले कतै सङ्क्रमण फैलिहाले धान्नै नसकिने अवस्था नआओस् !

विशेषज्ञहरूले तत्काल कोभिडको अर्को लहर फैलने जोखिम नभएको बताएका छन् । तर, तिनले कोभिड समाप्त भइसकेको त भनेका छैनन् । यसैले सङ्क्रमण रोकथामका लागि अपनाउनुपर्ने सावधानी अपनाउन र उपचारलगायतका सुविधा तयार अवस्थामा राख्न खेलाँची नगरौँ । 

तिहार, नेपाल सम्वतको नयाँ वर्ष र छठ पर्व मनाउने क्रममा विशेष सावधानी अपनाउन स्थानीय सरकारहरूले पनि जनतालाई सम्झाउने र निगरानी गर्ने गरून् । सावधान कोभिड अझै बाँकी छ !