कुनै पनि निहुँमा व्यक्तिको मर्यादा वा सार्वजनिक सम्पत्तिमा अतिक्रमण गर्नेहरूमाथि राज्यले प्रचलित कानुनअनुसार कारबाही गर्नुपर्छ । यसैले खानेपानी तथा ढल निकास कार्यालय, जनकपुरका प्रमुखमाथि दुर्व्यवहार गर्ने जनमत पार्टीका नेता कार्यकर्तामाथि कारबाही हुनु स्वाभाविकै हो ।
 
जनमत पार्टीका नामबाट केही उच्छृङंखल व्यक्तिहरूले बिहीवार कार्यालय प्रमुखलाई लछारपछार गरी नगरमा घुमाएका थिए । उनीहरूको नेता बसेकाे टोलमा खानेपानी तथा ढल निकास कार्यालयले खनेको खाडल बेलैमा नपुरेको निहुँमा जनमत पार्टीका नेता कार्यकर्ताको भिडले कार्यालयमा समेत तोडफोड गरेका थिए ।
 
कार्यालयभित्रै पसेर अपहरणका शैलीमा बन्धक बनाएर कार्यालय प्रमुखलाई दुर्व्यवहार गर्दा सुरुमा धनुषाको प्रहरी प्रशासन मूकदर्शक बनेको भन्दै आलोचना भएको छ । केही बेर भिडले दुर्व्यवहार गर्दै नगर परिक्रमा गराएपछि मात्र प्रहरीले हस्तक्षेप गरेको थियो ।
 
कार्यालय प्रमुखमाथि दुर्व्यवहार गर्नेहरूमध्ये केहीलाई पक्रेर प्रहरीले हिरासतमा लिएको छ । राजनीतिक आवरणमा गरिने यस्ता अपराधमा विगतमा हुल्याहाहरूलाई कारबाही नहुने गरेकैले जनमत पार्टीका नेता कार्यकर्ताले यो ‘पौरख’ देखाउने आँट गरेकाे हुनुपर्छ ।
 
यस उच्छृङ्खल हर्कतलाई सही बताएर जनमत पार्टीका अध्यक्षले अर्को ‘पौरख’ गरेछन् । व्यक्तिको मर्यादामा चोट पुग्ने गरी भएको उच्छृङ्खल हर्कत सही हो भन्ने लागेको हो भने तिनले यस अपराधको नैतिक जिम्मेवारी सार्वजनिकरूपमा लिने पनि हिम्मत गर्नु उचित हुनेछ ।
 
हुल्याहाहरूमाथि कानुनबमाेजिम सुरु गरिएको कारबाही बीचैमा तुहाउने काम नहोस् । साथै, असारमा खाल्टो खनेर जनताको आवागमन अप्ठेरो बनाएर छाड्ने खानेपानी तथा ढल निकास कार्यालयका प्रमुखसँग पनि सम्बन्धित तालुक कार्यालयले स्पष्टीकरण सोध्नु जरुरी देखिन्छ ।
 
काबुभन्दा बाहिरको परिस्थिति नभई कार्यालय वा ठेकेदारको हेलचेक्य्राइँका कारण जनता आक्रोशित भएका रहेछन् भने सरकारी दोषीहरू पनि कानुनबमाेजिम कारबाहीको भागी हुनुपर्छ । अनिमात्र जनमत पार्टीका हुल्याहा नेता कार्यकर्तालाई गरिएको कारबाही न्याय बन्न पुग्छ । 
 
खानेपानी तथा ढल निकास कार्यालयले खाल्टो खनेर अलपत्र छाडेको थियो भने जनमतका अध्यक्षले अगुवाइ गरेर सम्बन्धित कार्यालय वा तालुक अड्डाको ध्यानाकर्षण गरेको भए सही अभ्यास हुन्थ्यो । तिनले एक दिनमात्रै पनि विरोधमा धर्ना दिएका भए सम्भवतः धेरै समर्थन र सहानुभूति हासिल हुन्थ्यो । 
 
शान्तिपूर्ण राजनीति गर्ने प्रतिबद्धतासहित आएको जनमत पार्टीले पनि राजनीति र अपराधलाई छासमिस बनाउने अरू दलकै शैली अपनाउनु दुर्भाग्य हो । तराईमा अपराधको राजनीतिकरण बढी नै हुनेगरेको देखिएको छ । जनमत पार्टी त्यही बाटाको नयाँ यात्री बन्न पुग्यो ।

साथै, कार्यालयबाटै प्रमुखलाई अपहरण गरी भिडले नगर घुमाउँदासम्म पनि हस्तक्षेप गर्न नसक्दा धनुषा प्रशासन र प्रहरीको गम्भीर अक्षमता उजागर भएको छ । सरकारले धनुषा प्रहरी र प्रशासनका प्रमुखको कार्यशैलीमा समीक्षा गरेर सुधार वा परिवर्तन जो जे गर्नुपर्ने हो तत्काल गरोस् । यस्ता घटना दोहोरिन थाले भने राज्यको यसै पनि कमजोर विश्वसनीयता समाप्तै हुनेछ ।