नेता र कार्यकर्ताबीचको स्नेह र सद्भावको उदाहरण मानिन्थ्यो कुनै जजमानामा नेपाली कांग्रेस । विडम्बना, त्यही पार्टीमा अहिले क्रियाशील सदस्यता वितरणमा अन्याय भएको विरोधमा कार्यकर्ता अनशन बसेको महिनौ हुँदा पनि पार्टी सभापतिले वार्तासम्म पनि गर्दैनन् । 

तराईका केही जिल्लाका साथै सभापति शेरबहादुर देउवाको गृह जिल्ला डँडेलधुरामा समेत क्रियाशील सदस्यता वितरणमा अन्याय भएको भन्दै नेता कार्यकर्ताले असन्तोष प्रकट गरेका छन् । त्यही क्रममा सर्लाही कांग्रेसका कार्यकर्ता पार्टीको केन्द्रीय कार्यालयमा आमरण अनशनमा बसेका छन् ।   

पार्टी कार्यालयमा अनशन बसेका कार्यकर्तालाई बुधवार राति प्रहरीले जबर्जस्ती अस्पताल लगेको छ । यसबाट पार्टीका कार्यकर्ताप्रति शीर्ष नेतृत्वको संवेदनहीनताका साथै लोकतान्त्रिक मूल्यप्रतिको उपेक्षा पनि प्रकट भएको छ । 

अनशन गरेर निरङ्कुश राणा शासनमा पनि सत्तालाई झुकाउने बीपी कोइरालाले स्थापना गरेकै पार्टीमा पार्टी कार्यालयमा सत्याग्रहमा रहेका कार्यकर्तालाई प्रहरी लगाएर हटाएर नेपाली कांग्रेसले आफ्नै इतिहास मेटेको छ । यसका लागि इतिहासले अहिलेका सभापतिलगायत शीर्ष नेताहरूलाई पक्कै क्षमा गर्नेछैन ।

सभापति देउवाले त क्रियाशील सदस्यता विवादमा धाँधली गर्ने आरोप लागेकैहरूलाई साथ र संरक्षण दिँदैआएका नै छन् । दुर्भाग्य, सानेपाका सत्याग्रहीको अवस्था गम्भीर भइसक्ता पनि संस्थापन इतरका नेताहरूले समेत आवश्यक संवेदनशीलता देखाएनन् ।  

नेपाली कांग्रेसको सदस्यता विवादमा कुनै पक्षको हारजित जनसाधारणको चासोको विषय होइन । तर, प्रधानमन्त्री नै सभापति रहेको दलभित्र यस प्रकार निरङ्कुश र संवेदनहीन प्रवृत्ति बढ्दा राज्यको चरित्रमा त्यसको प्रत्यक्ष प्रभाव पर्नसक्छ । यो चिन्ताको विषय हो ।

यसैगरी राजधानीमा पार्टीको केन्द्रीय कार्यालयमा सत्याग्रह गर्दा पनि आधारातमा जबर्जस्ती हटाइन्छ भने मोफसलमा लोकतन्त्रको अवस्था कस्तो होला रु लोकतान्त्रिक मूल्यको यसरी उपहास हुँदा पनि अरू दलका नेताहरू र नागरिक समाजका अगुवाहरूको अत्यासलग्दो मौन अर्को गम्भीर चिन्ताको विषय हो ।

सत्याग्रहीको माग बेलैमा न्यायपूर्वक सम्बोधन गरिएको भए स्थिति यति जटिल हुने नै थिएन । पार्टी सभापतिका रूपमा कार्यकर्तालाई काखा र पाखा गरे पनि प्रधानमन्त्री देउवाले सत्याग्रहीप्रति भने लोकतान्त्रिक मूल्यअनरूप व्यवहार गर्नै पर्छ । यसैले थप कलङ्कको भारी नबोक्ने हो भने सभापति देउवा आफैँले सत्याग्रही भेटेर उनका माग सम्बोधन गरून् ।