काठमाडौं । बायर्न म्युनिख फरवार्ड रोबर्ट लेवनडोवस्की गोल गर्न चुकेका छन् । क्लबको कीर्तिमानी लगातार १९ खेलमा गोल गर्ने पोल्यान्डका फरवार्ड लेवनडोवस्की शुक्रबार राति जर्मन बुन्डेसलिगामा नव प्रवेशी ग्रेउथर फुर्थविरुद्ध गोल गर्न असफल भएका हुन् । तथापि दश खेलाडीमा सीमित बायर्न ३–१ ले विजयी भयो ।

लेवनडोवस्कीले ४०औं मिनेटमा गरेको प्रहार क्रसबारमा लागेर फर्किएको थियो । यससँगै उनी ग्रेड मुलरको कीर्तिमानी बराबरी गर्नबाट चुके । मुलरले बुन्डेसलिगाको १६ खेलमा लगातार गोल गरेका थिए । लेवनडोवस्कीले बुन्डेसलिगा, लिग कप र च्याम्पियन्स लिगमा गरी लागतार १९ खेलमा गोल गरेका हुन् । गत १५ फेब्रुअरीमा अर्मिनिया विलफिल्डविरुद्धको खेलयता लेवनडोवस्कीले सबै खेलमा गोल गरेका थिए । 

यसै सिजन बुन्डेसलिगामा उक्लिएको फुर्थले खेलेका ६ खेलमा जित निकाल्न सकेको छैन । एक खेल बराबरी खेलेको फुर्थले बाँकी पाँच खेल हारेको छ ।

फुर्थविरुद्ध बायर्नले थोमस मुलरको गोलबाट दशौं मिनेटमा अग्रता लिएको थियो । क्यानडाका रक्षक अल्फान्सो डेभिसले काउन्टर अट्याकमा अगाडि बढेर लेफ्ट विंग्सबाट गरेको क्रस विपक्षी खेलाडीमा डिफ्लेक्सन भएर मुलरको खुट्टामा पुगेको थियो । कसैको निगरानीमा नरहेका मुलरले कुनै गल्ती नगरी बललाई पोष्टका दिशा दिएका थिए । 

बायर्नका लागि दोस्रो गोल जोशुवा किमिचले गरे । किमिचले पनि मुलरकै शैलीमा गोल गरेका थिए । उनका लागि लोरोए सानेले क्रस गरेका थिए । ४८औं मिनेटमा रक्षक बेन्जामिन पाभार्डले रातो कार्डको सामना गरेपछि बायर्न दश खेलाडीमा सीमित भयो । घरेलु टोलीलाई पुनरागमन गर्ने मौका भए पनि त्यसको फाइदा लिन सकेन । 

६८औं मिनेटमा सेबास्टिन ग्रिसबेकले गरेको आत्मघाती गोलमा बायर्नले अग्रता बढायो । खेल सकिन दुई मिनेट बाँकी हुँदा सेड्रिक इटेनले गोल गरे पनि फुर्थलाई पुनरागमनका लागि धेरै ढिला भैसकेको थियो । 

‘‘हामीले जुन प्रदर्शन गरिरहेका छौं त्यसबाट खुसी छौं । र प्रत्येक नयाँ खेल शून्यबाट शुरु हुन्छ । हामीले अझै सुधार गर्न सक्छौं,’’ जारी सिजन लिगमा दोस्रो गोल गरेका मुलरले भने ।

बायर्नले गत साता अर्को नवप्रवेशी टिम बोचुमविरुद्ध ७–० को फराकिलो जित निकालेको थियो । यो जितसँगै बायर्न बुन्डेसलिगाको शीर्ष स्थानमा तीन अंकको स्पष्ट अग्रता लिएको छ । बायर्नले ६ खेलबाट १६ अंक जाडेको छ । जुन दोस्रो स्थानको उल्फ्सबर्गभन्दा तीन अंकले अगाडि हो । फुर्थ भने एक अंकका साथ लिगको अन्तिममा छ ।