खुला छाडिएको सार्वजनिक ढललाई सरकारी धराप भन्नु अत्युक्ति नहोला । धरापमा परेर कसैको मृत्यु भएमा त्यसको दोष पक्कै सरकारमाथि नै जान्छ । यसैले मंगलवार साँझ बूढानीफकण्ठ नगरपालीका ( १२ कपनको मिलन चोकमा ढलमा खसेर बालक बेपत्ता भएको घटनाको मूल दोषी सरकार नै ठहर्छ । 
 
ढलको पाइप खुलै छाडिएकाले त्यस प्रकारको दुःखद घटना भएको यो पहिलोपटक होइन । यसैगरी सहरी क्षेत्रमा मान्छेको ज्यान जोखिममा पर्नेगरी ढल र खाडल खुला छाडिएको पनि कपनमा मात्र होइन । यसैले पनि यो दुःखद घटनालाई भवितव्य मान्न सकिँदैन । 
 
तिनै अभागी बालकलाई लक्षित गरेर त्यो ढलको धराप थापिएको पक्कै होइन । तर, त्यस्तै प्रकृतिका दुर्घटना पटकपटक हुँदा पनि ज्यानमारा धरापको जोखिम बेवास्ता गर्ने सम्बन्धित अधिकारीहरू यस दुःखद घटनाका निम्ति जिम्मेवार भने हुन् ।
 
जनताको ज्यान जोखिममा पर्नेगरी हेलचेक्य्राइँ गर्दा पनि सजाय नहुने सरकारी अभ्यासले गर्दा अरू ठाउँमा  त्यस्तै जोखिम हुँदा पनि बेवास्ता गर्ने  प्रवृत्ति कर्मचारीहरूमा रहेको छ । कर्मचारीकै देखासिकी र सहमा निर्माण व्यवसायीले पनि यस्ता गम्भीर प्रकृतिका हेलचेक्य्राइँ गर्दै आएका छन् ।
 
यस्ता मानव निर्मित जोखिम र तिनबाट हुने क्षतिमा सम्बन्धित सरकारी अधिकारीलाई व्यक्तिगतरूपमै जिम्मेवार नबनाउँदासम्म सरकारी धराप थाप्ने काम रोकिने पनि देखिँदैन । यस्तै, सम्बन्धित स्थानीय तहका जनप्रतिनिधिले पनि यसमा उन्मुक्ति पाउनु हुँदैन । 
 
सरकारले यस्ता घटनाबाट सिकेर पनि सडकलगायत सार्वजनिक स्थानमा जोखिम हुने अवस्था उत्पन्न हुन नदिनु पर्ने हो । तर, नेपालका सरकारी कर्मचारीले अहिलेसम्म जनसाधारणका हुने जोखिमलाई गम्भीरतापूर्वक लिने गरेका छैनन् । 
 
सञ्चार माध्यमले घटनापछि ध्यान दिने गरे पनि अपेक्षित निरन्तरता दिने गर्दैनन् भने नागरिक समाजका अगुवाहरूको ध्यान पनि यस्ता विषयमा जाने गरेको देखिएको छैन । 
 
अर्थात्, राज्यमात्र होइन समाज पनि जनताको ज्यानै जानसक्ने विषयमा समेत उदासीन हुँदैआएको छ । सम्भवतः सबैभन्दा चिन्ताको विषय यही हो । सरकारी कर्मचारी वा ठेकेदारको हेलचेक्य्राइँप्रति समाजको यस प्रकारको उदासीनता पनि यस्ता घटनामा उत्तिकै दोषी देखिन्छ ।
 
यसैले सहरको सुन्दरता, सुविधा र सुरक्षा सबै बिगार्ने यस्ता जोखिमपूर्ण धराप अन्त्य गर्न अभियानै चलाउनु आवश्यक देखिन्छ  ।  तर, दोषी व्यक्ति सरकारी कर्मचारी र ठेकेदारलाई कारबाही नगरी यस्तो अभियान सफल हुँदैन । कपनमा ढलको धराप थाप्नेलाई कारबाही गरेर यो अभियान सुरु गरियोस् ।