सत्ताको प्रमुख साझेदार दल नेपाली कांग्रेसको महाधिवेशन कार्यतालिका फेरि संशोधन गरिएको सूचना सार्वजनिक गरिएको छ । सायद, निर्वाचन समितिका पदाधिकारीले नै महाधिवेशनको कार्यतालिका परिवर्तन भएको पटक बिर्सिसके होलान् । 

यसभन्दा पहिले नेपाली कांग्रेसको महाधिवेशन यति जटिल कहिल्यै बनाइएको थिएन । प्रतिबन्धित अवस्थामा रहेका बेलामा समेत कुनै न कुनै उपाय गरेर पार्टीलाई वैधता दिने प्रयास यसका नेताले गरेका उदाहरण छन् ।

विडम्बना, यसपटक धेरै जिल्लामा क्रियाशील सदस्यता वितरणमै धाँधली गरेको आरोप संस्थापन पक्ष र त्यसमा पनि सभापति शेबहादुर देउवामाथि नै लागेको छ । सभापति देउवाको गृहजिल्ला डँडेलधुरा त धाँधलीको उदाहरणै बन्नपुग्यो । परिवर्तित कार्यतालिका  फेरि बदलिँदैन भनेर कसैले पनि ठोकुवा गर्न सक्ला र ?

सभापति देउवाका यसअघि राजनीतिमा नदेखिएका छोरालाई क्रियाशील सदस्यता दिइएको र पुराना धेरैको नाम काटिएको भन्दै पार्टीका जिल्ला सभापतिलगायत महाधिवेशन प्रक्रियामा सहभागी नभए पनि डँडेलधुरामा वडास्तरीय अधिवेशन गरियो ।

पार्टीका महामन्त्रीलगायत वरिष्ठ नेताहरूले सभापति देउवालाई भेटेर डँडेलधुरामा गरिएको बलमिच्याइँको विरोध गर्दै असन्तुष्ट पक्षको माग सम्बोधन गर्न आग्रह गरेका थिए । तर, नेताहरूलाई डँडेलधुराको वडा अधिवेशन रोक्ने वचन दिएर पनि देउवाले बलमिच्याइँ जारी नै राखे ।

डँडेलधुरामा सभापति देउवाले नेपाली कांग्रेसको आसन्न महाधिवेशनको पूर्वाभ्यास गरेका त होइनन् भन्ने प्रश्न धेरै कांग्रेसजनको मनमा उठेको हुनुपर्छ । निर्वाचन समितिका संयोजक राजीनामै दिने मनःस्थितिमा पुग्नुले पनि स्थितिको गम्भीरताको अनुमान लगाउन सकिन्छ ।

सभापति देउवालाई धाँधली गरेरै र पुराना साथीलाई पन्छाएरै भए पनि पार्टीमा कब्जा जमाउन सके पुग्छ भन्ने लागेको देखियो । परन्तु, कुनै दिन 'सेर -ए -पश्चिम' भनेर आफ्ना नेताबाट धाप मारिएको व्यक्तिले २०४८ देखि अहिलेसम्म चुनाव जिताउने साथीहरूलाई धाँधली गरेर पन्छाउने रणनीति अपनाउनु नैतिक र राजनीतिक पतन हो । 

नेपाली कांग्रेसको अगुवाइमा नेपाली जनताले पटकपटक लोकतन्त्रका लागि आत्माहुति दिएका छन् । यसैलाई आफ्नो सफलता ठानेर होला कांग्रेसका नेताहरू कम्युनिस्टहरूलाई संसदीय लोकतन्त्रमा ल्याएको गुड्डी हाँकेर थाक्तैनन् । 

अहिले कांग्रेसको अवस्था हेर्दा भने देउवाले कम्युनिस्ट नेताहरूको पार्टी कब्जा गर्ने पद्धति पो आत्मसात गरेका रहेछन् भन्ने देखियो । महाधिवेशनसमेत निष्पक्ष नभए पार्टीमा निष्ठावान इमानदार कार्यकर्ता पार्टी त्याग गर्ने वा निस्क्रिय बस्ने बाटो अवलम्बन गर्न सक्छन् ।

यसैले नेपाली कांग्रेसका नेता कार्यकर्ता विशेषगरी देउवाकै पक्षका समेत सबैले 'एक मुठी माटो हातमा लिएर' विवेक प्रयोग गरून् । के अहिले देउवाले रोजेको बाटोले नेपाली कांग्रेसलाई एकताबद्ध बनाई राख्ला ? के उनको कार्यशैलीले लोकतन्त्र बलियो होला ? पक्कै सक्तैन !