काठमाडौं । नेपाली कांग्रेस सदस्यता छानबिन समितिले क्रियाशील सदस्यताको छानबिन समितिले दोस्रोपकट प्रतिवेदन बुझाएको छ । गत १२ गते पहिलो प्रतिवेदन बुझाएको समितिलाई बुधबार बसेको कांग्रेस पदाधिकारी तथा पूर्वपदाधिकारीको बैठकले २४ घण्टाको समय दिएर त्रुटि सच्याउन र बाँकी विषय मिलाउन भन्दै प्रतिवेदन फिर्ता गरेका थियो । 

“हामीले थप २४ घण्टा प्राप्त गरेका थियौँ । यबीचमा हामीले त्रुटिहरू सच्याएका छौँ, उजुरी र निवेदनहरूमा सर्वसम्वतिबाट निर्णय गरेका छौँ,” क्रियाशील सदस्यता छानबिन समितिका सदस्य प्रदीप पौडेलले भने, “सप्तरी, बारा धनुषा निर्वनचन क्षेत्र नम्बर–४, सर्लाही क्षेत्र नम्बर–२,  सिन्धुपाल्चोक र रसुवामा समस्या केन्द्रीय तहबाट हुन्छ, हामीले सकेनौँ ।” 

उनले छानबिन समितिमा आएका विवादका आधारमा सयवटा वडाका नयाँ क्रियाशील सदस्यता स्थगन गरेको जानकारी दिए ।उनले ६,७४३ वडामध्ये ४ प्रतिशत वडामात्र स्थगन भएको बताए ।

१३ औँ महाधिवेशनमा ३३ वटा निर्वाचन क्षेत्रमा समस्या आएको भन्दै अहिले छानबिन समितिका कारण महाधिवेशन प्रभावित हुने अवस्था नरहेको उनले बताए । 

“त्यसमा पनि हिजोभन्दा आज १० बटा वडा तहको सच्यायौँ अनि प्रतिवेदन बुझायौं,” पौडेलले भने, “यसअघि हामीले सर्वसम्मतिमै निर्णय गरको थियौ, हामीलाई प्राप्त जिम्मेवारी पनि सर्वसम्मतिमै गर्ने थियो । तर, नोट अफ डिसेन्ट बाँकी नै छ ।” 

पौडेलले कल्याण गुरुङले आफैँले गरेका निर्णयमा पनि ‘नोट अफ डिसेन्ट’ लेखेको भन्दै त्यसमा रोक्न नसकिएको बताए । 

“यत्रो वातावरण बनिसकेपछि अधिवेशन रोक्नु हुन्न,” पौडेलले भने, “साउनको अन्तिम साता वडा अधिवेशन थालेर भदौ १६ देखि १९ महाधिवेशन गर्नुपर्छ ।”