जनकपुरधाम । प्रदेश नम्बर–२ का किसानलाई धान रोपाइँ गर्ने चटारो छ । यो वर्ष असार पहिलो सातादेखि नै वर्षा भएकोेले किसानलाई अहिले भ्याइनभ्याइ भएको हो ।

महोत्तरीको भंगहा नगरपालिका–९, अजगैवाका रामजीवन यादव बिहीबार परिवारका सदस्यसँगै खेती कर्ममा व्यस्त थिए ।

“अहिले गाउँमा धान रोपाइँ गर्न मारामार छ,” उनले भने, “गाउँमा कसैलाई फुर्सद छैन । सबै रोपाइँमा व्यस्त छन् ।”

जनशक्ति, मल र सिँचाइको अभावले प्रत्येक वर्ष धान रोपाइँ ढिलो हुने गरेको उनको भनाइ छ । कृषिको लागि उर्वर भूमि मानिएको अजगैवामा सिँचाइको अभाव छ ।

कृषि ज्ञान केन्द्र महोत्तरीका अनुसार जिल्लाको कुल ७० हजार हेक्टर जमिनमध्ये ५८ हेक्टर जमिन खेतीयोग्य छ । ४४ हजार ६०० हेक्टर जमिनमा धान खेती हुँदै आएको छ । तर, १५ हजार हेक्टर जमिनमा मात्र सिँचाइ सुविधा भएको केन्द्रले जनाएको छ ।