चितवन । चितवनको राप्ती नगरपालिकाको राजमार्ग क्षेत्रमा लगाइएको कर्फ्यूको समायवधि थपिएको छ । 

सुजिता भण्डारी मृत्यु घटनाको निष्पक्ष छानबिन तथा दोषीलाई कारबाहीको दायरामा ल्याउनुपर्ने मागसहित हुने गरेको स्थानीयको प्रदर्शनले उग्र रूप लिन थालेपछि चितवन प्रशासनले हिजो (मंगलबार) साँझ साढे ७ बजेदेखि आज (बुधबार) साँझ साढे ७ बजेसम्मका लागि कर्फ्यू जारी गरेको थियो ।

तर, अवस्था अझै सामान्य भइनसकेको भन्दै प्रशासनले बुधबार साँझ जारी कर्फ्यूको समायवधि बढाएको हो । जस अनुसार जिल्ला प्रशासन कार्यालय चितवनले बिहीबार ७ बजेसम्मका लागि कर्फ्यू थप गरेको छ । कर्फ्यू राप्ती नगरपालिकाको राजमार्ग क्षेत्रमा लागु हुने छ ।

तर, बिहीबार बिहान ५ बजेदेखि ८ बजेसम्म अत्यावश्यकीय वस्तु खरिदका समय दिइएको छ । उक्त समयमा पनि तीन जनाभन्दा बढी हिँड्न पाइने छैन । यस्तै, लामो दुरीका सवारी साधनलाई चल्न दिइने छ ।

प्रशासनले कर्फ्यू उलङ्घन गरे एक महिनासम्म कैद सजाय हुने चेतावनी दिएको छ ।