चितवन । असार २० गते आइतबार साँझ राप्ती नगरपालिका वडा नम्बर ३ स्थित स्थानीय ब्रह्मस्थानी सामुदायिक वनमा मृत फेला परेकी राप्ती नगरपालिका वडा नम्बर ३ की  सुजिता भण्डारीको हत्यारा यथाशक्य पत्ता लगाउन माग गर्दै स्थानीयले  प्रदर्शन र नाराबाजी गरेका छन् ।

 आक्रोशित स्थानीयको प्रर्दशनले पूर्वपश्चिम राजमार्ग अवरुद्ध भएको छ । उनीहरुले सडकमा अवरोध खडा गर्दै ‘मरेपछिको प्रहरी चाहिंँदैन’, ‘सुजितालाई न्याय दे’ जस्ता नारा लगाएका छन् । घटनाले उग्ररुप लिएपछि सयौंको संख्यामा नेपाल प्रहरी र सशस्त्र प्रहरी तैनाथ गरिएको छ । शव परीक्षणका लागि भरतपुर अस्पताल ल्याउन लागेको एम्बुलेन्समा स्थानीयले अवरोध गर्दा भरतपुर ल्याउन नसकिएको जिल्ला प्रहरी कार्यालय, चितवनका प्रवक्ता सूर्यबहादुर थापाले बताए । “स्थानीयले शव परीक्षणका लागि ल्याउन दिएका छैनन्, भीड पनि अनियन्त्रित छ । हामी पनि तनावमा छौं । थापाले भने,” पूर्वपश्चिम राजमार्ग पनि पूर्ण रुपमा बन्द छ ।”  

घटनाको  सुक्ष्म अध्ययन गर्न केन्द्रीय अनुसन्धान व्युरो टोली आए पनि स्थानीयले शव ल्याउन दिएका छैनन् । उनीहरुले सत्यतथ्य पत्ता लगाई अपराधी पत्ता लगाएर कारवाहीको ग्यारेन्टी दिन माग गरिरहेका छन् । राप्ती नगरपालिकाका प्रमुख प्रभा बरालले आफन्तजन, स्थानीय अगुवा, समाजसेवी, सुरक्षा प्रमुख, प्रमुख अधिकारीलगायतलाई राखेर छलफल गर्न लागिएको बताइन् । “स्थानीयले हामीलाई हत्यारा पत्ता लगाउन र शव परीक्षणको सत्यतथ्य, यथार्थको होस भनेर ग्यारेन्टीको माग गर्नुभएको छ । सीडीओ साव आउंँदै हुनुहुन्छ छलफल गर्दैछौं ,” बरालले भनिन् । 

जिल्ला प्रशासन कार्यालय, चितवनका सूचना अधिकारी खेम पौडेलले स्थानीयले शव ल्याउन अवरोध गरेको बताए । “स्थानीयले अनुसन्धान र दोषीको खोजी गर्न ढिला भयो भनेर विरोध गरेका छन् । सीडीओ साब त्यहीँ हुनुहुन्छ,” पौडेलले भने । 

घटना भएको ११ दिनसम्म पनि प्रहरीले अनुसन्धान र खोजी गर्न सक्रियता नदेखाएको भन्दै उनीहरु आक्रोशित बनेका हुन् ।

असार ११ गते बिहान ६ बजे साथीको घर जाने भनेर हिँडेकी सुजिता सोही दिनदेखि बेपत्ता भएकी थिइन् । उनले सोही दिन १२ बजे दिदीलाई फोन गरेर अपहरणमा परेको बताएकी परिवारजनको भनाइ छ ।