काठमाडौं । काठमाडौंको अत्याधिक सवारी जाम हुने क्षेत्र कोटेश्वर जडिबुटी सडकखण्डमा नयाँ लेन विस्तार भइरहेको छ । निषेधाज्ञामा सवारी जाम कम गर्ने उदेश्यले नयाँ लेन विस्तार भइरहेको सडक डिभिजन कार्यालयले जनाएको छ । 

अहिले लेन विस्तारका लागि गिट्टी हाल्ने, फुटपाथ मिलाउने काम भइरहेको सडक डिभिजन कार्यालयका प्रमुख कुबेर नेपालीले जानकारी दिए । ‘‘निषेधाज्ञाकैबीच कोटेश्वरको जाम कम गर्न नयाँ लेन विस्तार गरिरहेका छाैँ। निषेधाज्ञामा लेन विस्तारको काम रोकेनौँ । अहिले यो सडकखण्डमा करिब एक किलोमिटर नयाँ लेन विस्तार गर्ने काम भइरहेको छ,” प्रमुख नेपालीले भने, ‘‘असार महिनाभित्रै हामीले नयाँ लेन कालोपत्रे गरिसक्ने लक्ष्य राखेका थियौँ । तर अहिले बर्सातको मौसम भएकाले मौसमले साथ दिइरहेको छैन् । अरू सबै काम अन्तिम चरणमा पुगेपनि कालोपत्रेको काम लम्बिने देखिएको छ ।”

उनले लेन विस्तार गर्ने अन्तर्गत चार लेयरको काम भइरहेको बताए । ‘‘अहिले बर्सातको मौसम छ । मौसमले लेन विस्तारमा बाधा नपुर्‍याएको भए नयाँ लेन असार अन्तिमसम्म तयार हुन्थ्यो । दोस्रो लहरको कोरोना महामारी पनि छ । वर्षाका कारणले कालोपत्रेको काम अगाडि बढाउन सकिएको छैन,” नेपालीले भने, ‘‘निषेधाज्ञा खुकुलो भएपनि संक्रमणको जोखिम कायमै छ । निर्माण गर्दा चाहिने सामग्री भएपनि वर्षाले साथ दिइरहेको छैन । नयाँ लेन कालोपत्रे गर्नको लागि कम्तीमा पनि एकसातासम्म घाम लाग्नुपर्छ । कोटेश्वर पहिलेको कोटेश्वर जडिबुटी सडकखण्ड चार लेनको विस्तारित छ । अब थप नयाँ तीन लेन विस्तार गरिनेछ ।”

कोटेश्वरबाट जडीबुटीतर्फ जाँदा दुई लेन र बायाँ एक लेन सडक थप गर्न लागिएको कार्यालयले जनाएको छ । 

कोटेश्वर जडिबुटी सडकखण्ड उपत्यकाको कलङ्की पछिको अत्याधिक सवारी जाम हुने क्षेत्र हो । त्यहाँको जाम व्यवस्थापन गर्ने अनेकौँ प्रयास नभएका भने होइनन् । तर अहिलेपनि सवारी साधनले घण्टौसम्म जाममा बस्नुपर्ने अवस्था छ । 

महानगरीय ट्राफिक प्रहरी महाशाखाले पनि नयाँ लेन बनेपछि कोटेश्वरको जाम कम हुने अपेक्षा गरेको छ । महाशाखाका एसएसपी जनक भट्टराईले ट्राफिक लाइट व्यवस्थापन, ट्राफिक जनशक्ति खटाइएको बताए । उनले भने, ‘‘नयाँ लेन विस्तार भइरहेको छ । अब नयाँ लेन विस्तार भइसकेपछि जाम कम हुनेछ । सवारी साधन, यात्रु, खटिएका ट्राफिक प्रहरीलाई अलिकति भएपनि राहत मिल्नेछ ।”

तीन लेन सडक विस्तार गर्ने कामको ठेक्का टुन्डी सुसन जेभीले पाएको छ । २०७७ पुस २१ गते निर्माण व्यवसायी कम्पनी र सडक डिभिजन कार्यालय काठमाडौंबीच सम्झौता भएको थियो । योजनाको लागत ७ करोड ८१ लाख रहेको छ । सम्झौता अनुसार आगामी असारसम्ममा निर्माण सम्पन्न गरिसक्नुपर्नेछ ।